Máslıhattarǵa 30 depýtat saılandy

Caılaý zańnamasyna sáıkes, 30 qazanda elimizdiń 10 óńirindegi 30 saılaý okrýginde máslıhattardyń shyǵyp qalǵan depýtattarynyń ornyna saılaý ótken edi. Keshe onyń qorytyndy nátıjesine baılanysty Ortalyq saılaý komıssııasy tóraǵasynyń orynbasary Vladımır Foos pen Komıssııa múshesi Lázzat Súleımen brıfıng ótkizdi. Vladımır Foostyń habardar etýinshe, saılaýdy uıymdastyrý men ótkizýge 10 oblystyq, 6 qa­lalyq, 17 aýdandyq, 30 okrýgtik já­ne 160 ýchaskelik saılaý komıssııasy tartylǵan. Saılaý naýqany barysynda barlyǵy 101 kandıdat usynyldy. Olardyń ishinde 16-sy oblystyq máslıhatqa, 35-i qalalyq máslıhatqa jáne 50-i aý­dandyq máslıhatqa daýysqa tústi. «31 úmitkerdi saıası partııa­lar, al 70 aza­mat ózin-ózi usyndy, – dedi OSK tóraǵasynyń orynbasary. – Ok­rýgtik saılaý komıssııalary máslıhattar depýtattyǵyna kan­­dıdattar retinde 96 adamdy tirkedi. Saılaý bıýlletenderine 92 kan­­dı­dattyń tegi engizildi. Or­tasha básekelestik bir depýtat­tyq mandatqa shamamen 3 úmitkerdi qurady». Al L.Súleımen saılaý úderisine toqtaldy. Onyń aıtýynsha, daýys berý 2016 jylǵy 30 qazan kúni 160 saılaý ýchaskesinde ótti. Saılaýshylardyń kelýi 79,6%-dy qurady. Daýys berý qo­ry­tyndylaryna sáıkes oblystyq máslı­hattyń 4 depýtaty, qalalyq máslı­hattyń 10 depýtaty jáne aýdan­dyq máslıhattyń 16 depýtaty saılan­dy. Daýys berý barysy men daýys­tardy sanaý rásimin baıqaýdy kandı­dattardyń senim bildirilgen adamdary, saıası partııalardyń, qoǵamdyq bir­lestikterdiń jáne BAQ ókilderi – bar­lyǵy 396 adam júzege asyrǵan. «Más­lıhattardyń saılanǵan depýtattarynyń quramynda 29 er adam jáne bir áıel bar, – dep jalǵastyrdy sózin OSK múshesi. – Máslıhattardyń saılanǵan depý­tat­tarynyń ortasha jasy – 45. Eń jas depýtat Batys Qazaqstan oblysy, Syrym aýdanynyń №6 saılaý ok­rý­ginde saılandy. Onyń jasy 24-te. Eń egdesi 63 jastaǵy depýtat Qaraǵandy qala­sy máslıhatynyń №30 saılaý okrýginen saılandy». Brıfıngti ótkizýshilerdiń atap ót­kenindeı, saılanǵan depýtattardyń 96,67% joǵary bilimdi, 3,33%-ynyń arnaıy orta bilimi bar. Al 40%-y memlekettik mekemelerde, uıymdar men kásiporyndarda, 53,3%-y kommersııalyq qurylymdarda qyzmet isteıdi, 6,7%-y saıası partııalar men úkimettik emes uıymdardyń qyzmetkerleri. Saılaý naýqany saılaý zańnamasy normalarynyń talaptaryna sáıkes ótken. Ortsaılaýkomǵa shaǵymdar men ótinishter túspegen. Álısultan QULANBAI, «Egemen Qazaqstan»