Sh.Aımanov atyndaǵy «Qazaqfılm» kınostýdııasynda túsirilgen «Qunanbaı» fılmi Ýfa qalasynda ótken «Kúmis Aqbozat» atty III Halyqaralyq ulttyq jáne etnıkalyq kınofestıvalinde Ámir Ábdirazaqov atyndaǵy «Ulttyq rýh» júldesimen marapattaldy.
«Qunanbaı» fılmi – Uly Abaıdyń ákesi – Qunanbaı О́skenbaıulynyń ónegeli ómiriniń bir kezeńin qamtıdy. Kartınanyń rejısseri – Qazaqstannyń halyq ártisi, Memlekettik syılyqtyń laýreaty Doshan Joljaqsynov.
«Shyǵarmashylyq toptyń fılmdi qolǵa alýdaǵy basty maqsaty: halqymyzdyń qundylyqtaryn dáripteý arqyly jastardyń boıynda ulttyq rýhty oıatý bolatyn. Endi mine, búginde eńbegimiz baǵalanyp jatyr. Kartınany túsirýge atsalysqan túsirý tobyn osy jeńispen quttyqtaımyn», - dedi Doshan Joljaqsynov.
Halyqaralyq «Kúmis Aqbozat» kınofestıvali álem halyqtarynyń rýhanı jáne mádenı qundylyqtaryn nasıhattaý, ulttyq jáne etnıkalyq baǵyttaǵy fılmderdi túsirýshi kınematografıster shyǵarmashylyǵyn dáripteý, Reseı aımaqtary jáne sheteldermen mádenı qatynasty damytý úshin arnaıy jasalǵan. Kınofestıval Ýfa qalalyq okrýgi ákimdiginiń qoldaýymen Bashqurtstan úkimeti men Bashqurtstan Respýblıkasynyń mádenıet mınıstrligi, «Bashqurtstan» kınostýdııasynyń uıymdastyrýymen ótti.