Qazaqstannan Praga, Vena, Varshavaǵa áýe baǵdary ashylady. Bul týraly búgin Úkimet otyrysynda QR Investısııalar jáne damý mınıstri Jeńis Qasymbek málim etti.
Mınıstrdiń aıtýynsha, búgingi kúni Astana 25 halyqaralyq baǵdar boıynsha 16 elmen tikeleı áýe baılanys ornatqan. Onyń ishinde Frankfýrt, London, Dýbaı, Gonkong, Seýl syndy 5 halyqaralyq qarjy ortalyǵy da bar. Jalpy, bir aptada elorda áýejaıynan 415 reıs oryndalady. Onyń 126-sy halyqaralyq, al 289-y ishki baǵdarlar.
«EKSPO-2017-ge» daıyndyq úshin «ashyq áýe» jáne Astana áýejaıynda kúndelikti reısterge shekteýlerdi alyp tastaý boıynsha ilki jobalardy iske qosý josparlanýda. Praga, Helsınkı, Vena, Varshava, Býpapesht syndy 8 jańa baǵyt ashylady dep kútilýde», - dedi Qasymbek.
Onyń sózine qaraǵanda, 2012 jyly ishki áýe tasymaldaý naryǵy tolyǵymen yryqtalǵan. Qazirgi ýaqytta 6 áýe kompanııasy 39 baǵdar boıynsha ishki reısterdi oryndaıdy. Ishki baǵdarlar sýbsıdııalanady. Aǵymdaǵy jyly týrızmdi damytý maqsatynda Almaty men Astanadan Balqashqa, Almatydan Úrjarǵa jáne Aqtaýdan Kókshetaýǵa áýe reısi ashylǵan. Kelesi jazǵy maýsymda Astanadan Úrjarǵa, Almaty men Astanadan Úsharalǵa áýe reısin ashý kózdelip otyr.