Búgin Úkimet otyrysynda QR Premer-Mınıstri Baqytjan Saǵyntaev Qazaqstandaǵy ishki áýe tasymaldaryndaǵy tarıfterge qatysty tekserýdi tapsyrdy.
«Avıasııa salasynda aýqymdy jumystar iske asyrylýda. Osy rette tranzıttik áleýet artyp keledi, ıaǵnı Astana arqyly óte kóp reıster shyǵyp jatyr. Búginde Eýropaǵa, onyń ishinde Parıjge qaraı baǵdarda kóbinese qytaılyq týrıster bizdiń reısterdi paıdalanýda. Bul óte jaqsy kórsetkishter, biraq, sonymen birge el ishindegi tarıfterge qatysty másele bar ekenin baıqap otyrmyz. Ásirese, Astana-Almaty baǵdaryna qatysty. Bul turǵyda QR Ulttyq ekonomıka mınıstrligi tıisti zertteý sharalaryna kirisken bolatyn», dedi B. Saǵyntaev.
О́z kezeginde QR Ulttyq ekonomıka mınıstri Qýandyq Bıshimbaev keıbir baǵyttar boıynsha edáýir tarıfter ósimi bar ekenin jetkizdi. Osy oraıda ishki áýe tasymalyndaǵy Astana-Oral, Astana-Almaty baǵdarlarynda bundaı jaǵdaı baıqalyp otyrǵan kórinedi.
Qazirgi kezde Tabıǵı monopolııalardy retteý komıteti tasymaldyń ózindik qunyn anyqtaýǵa tyrysýda. «О́kinishke qaraı, kompanııalar reısterdi oryndaýdyń ózindik qunyna baılanysty málimetterdi berýden bas tartýda. «Samuryq-Qazyna» dırektorlar keńesiniń múshesi retinde resmı túrde qorǵa, sáıkesinshe onyń enshiles kompanııasyna reısterdi oryndaýdaǵy ózindik qunyna qatysty barlyq esep-qısapty usyný týraly saýal joldaǵym keledi. Osy málimetterden keıin baǵany ósirý qanshalyqty negizdi ekeni jaıynda sheshim shyǵarýǵa bolady»-dedi Q. Bıshimbaev. Bul turǵyda Úkimet basshysy B. Saǵyntaev osy baǵyttaǵy sharalardy sońyna deıin jetkizip, zań buzýshylyqtar oryn alǵan jaǵdaıda zańnamaǵa sáıkes, tıisti sheshim qabyldaý kerektigin júktedi.