Paralımpıada oıyndarynyń jeńimpazdary men júldegerleriniń jáne olardyń bapkerleriniń sporttyq eńbegin aqshalaı baǵalaýdy teńestirý týraly bastama memleket qoldaýyna ıe bolady, dep habarlady «Aq jol» demokratııalyq partııasynyń baspasóz qyzmeti.
«Respýblıkalyq bıýdjettik komıssııanyń 2016 jyly 22 qyrkúıek kúngi №22 sheshimimen Paralımpıada oıyndarynyń jeńimpazdary men júldegerlerin jáne olardyń bapkerlerin kótermeleý Olımpıada oıyndarynyń júldegerlerin kótermeleý mólsherimen teńestirý bastamasy maquldandy», - delingen Premer-Mınıstr B.Saǵyntaevtyń qoly qoıylǵan resmı jaýapta.
Sonymen birge hatta QR Úkimetiniń tıisti qaýly jobasy týraly memlekettik organdardyń kelisimge kelgeni jáne Zańnamaǵa sáıkes qabyldanatyny habarlandy.
Eske sala ketsek, múmkindigi shekteýli jandardyń sporttyq nátıjeleri joǵary baǵalansa da, bizdiń elimizde Paralımpıada chempıondaryna beriletin syıaqynyń resmı bekitilgen mólsheri Olımpıada jeńimpazdaryna qaraǵanda 5 ese az.
21 qyrkúıek kúni Májilistiń plenarly otyrysynda «Aq jol» fraksııasy azamattardyń sporttyq nátıjelerin memlekettiń birdeı baǵalaýy týraly máseleni qaıta kóterdi. Eń alǵash olımpıadashylar men paralımpıadashylardy teńdeı yntalandyrý qajettigi týraly depýtattyq saýaldy «Aq jol» partııasy 2014 jyldyń 2 sáýirinde Úkimetke jiberdi. Onda Úkimet Qazaqstanda paralımpıada chempıondary men júldegerleriniń áli shyqpaǵandyǵyn aıtyp jaýap bergen edi.