Qazaqstan ushaqpen jolaýshylar tasymaldaýda TMD elderi ishinde 2-shi orynǵa kóterildi. Bul týraly Úkimet otyrysynda QR Investısııalar jáne damý mınıstri Jeńis Qasymbek málim etti.
«Sońǵy 5 jylda azamattyq avıasııa salasynda negizgi kórsetkishterdiń turaqty ósimi baıqalady. Tasymaldanǵan jolaýshylar sany 44 paıyzǵa artyp, 4,1-den 5,9 mln. adamǵa jetti. Sońǵy jyldary qyzmet kórsetilgen jolaýshylardyń ortasha jyldyq ósim qarqyny 9 paıyzdy qurap otyr», - dedi ol.
Mınıstrdiń derekterine sáıkes, Qazaqstan ushaqpen jolaýshylar tasymaldaýda TMD elderi ishinde 2-shi orynǵa kóterilgen. Bul rette ótken jyly Astana áýejaıy jolaýshylarǵa qyzmet kórsetýde 10-shy, al Almaty 6-shy orynǵa kirip, TMD-nyń iri 10 áýejaıynyń legine qosylǵan. Búginde elimizdiń 18 áýejaıynyń 10-ynda jolaýshylar termınalyn, al 14-inde ushý-qoný jolaǵyn jańǵyrtý júrgizilgen. Osy jyldyń sońyna deıin Petropavl qalasynyń áýejaı termınaly men ushý-qoný jolaǵy, 2020 jylǵa deıin Semeı, Qostanaı, О́skemen áýejaılarynyń ushý-qoný jolaǵy jańartylatyn bolady.
«Memleket ushý-qoný jolaǵyn jańǵyrtý boıynsha ózine alǵan mindettemelerin tolyq kólemde oryndaýda. Endi áýejaılardyń menshik ıeleri termınaldardyń jańǵyrtylýyn qamtamasyz etýi qajet», - dedi mınıstr.