Elordada áleýmettik taqyryptaǵy sýret baıqaýyna ótinish qabyldaý aıaqtaldy.
Shyǵarmashylyq konkýrsqa 18 ótinish túsip, 25 sýret usynylǵan. Qatysýshylar A3 formatynda ulttyq mádenıetti qoldaý, otansúıgishtikti nasıhattaý, densaýlyq saqtaý jáne bilim berý máseleleri sekildi taqyryptardy qamtyǵan.
Konkýrsanttarǵa qoıylǵan taǵy bir talap - jumystarynda Qazaqstan Respýblıkasy Táýelsizdiginiń 25 jyldyǵyna jáne EKSPO-2017 kórmesine arnalǵan elementterdi paıdalaný. Baıqaýǵa Astanada turatyn, bilim alatyn nemese jumys isteıtin adamdar qatysady. Eń jas sýretshiniń jasy 9-da bolsa, eń eresegi – 25-te.
Jeńimpazdardy arnaıy komıssııanyń músheleri irikteıdi. Olar bir apta boıy úzdik jumystardy tańdaıtyn bolady. Baıqaý qorytyndysy 7 qarashada shyǵarylyp, jeńimpazdarǵa dıplomdar men baǵaly syılyqtar tabys etiledi. Al eń úzdik jumystar atalǵan taqyryptar boıynsha jarnamalyq konstrýksııalardy daıyndaýda paıdalanylyp, qala kóshelerine ornalastyrylady.