«Bilim bastamalaryn qoldaý qory» «QazAlıans» qoǵamdyq birlestiginiń Ulybrıtanııadaǵy ókildiginiń qatysýymen balabaqsha jáne bastaýysh synyp balalaryna arnalǵan I «Qulynshaq» taqpaqtar saıysynyń qorytyndysyn jarııalady. Bul týraly joba avtory, jýrnalıst Rahat Jaqsybaı óziniń feısbýktegi paraqshasynda jazdy.
Baıqaýdyń negizgi maqsaty – balalardyń tiline laıyqtalǵan memlekettik tildegi óleń-taqpaqtardyń sanyn kóbeıtý jáne balalar taqyrybyna jazatyn aqyndar men janashyrlardyń yntasyn arttyrý. 2016 jyldyń 22 tamyzynda bastalǵan baıqaýǵa avtorlar tarapynan jalpy sany 400-ge jýyq shyǵarma jiberildi. Taqyryptar men shyǵarmalar sanyna shek qoıylmady.
Sharanyń nátıjesi men jeńimpazdardyń esimi búgin «Qulynshaq» baıqaýynyń jeńimpazdaryn jarııalaý» onlaın sharasynda ataldy.
"Árbir jobaǵa jeke qyzyǵýshylyqpen kelemiz. Ulybrıtanııa elinde bilim alyp jatqandyqtan, aǵylshyn tilindegi resýrstarǵa kóz sala júresiń. Astanada bastaǵan sharamyzdyń qorytyndysyn oqý jaǵdaıyna baılanysty Londonnan jarııalaýǵa týra kelip tur. Máselen, aǵylshyn mektepterinde balalarǵa oqýǵa ne jattaýǵa berilgen tapsyrmalardy sapaly ári balalarǵa qyzyqty formada onlaın tabýǵa bolady. Bul jaǵynan bizde qazaq tilindegi materıaldardy, úıretý, oqytý kontentin tabý ońaı emes. Sondyqtan, alǵashqy qadamdy, osy salanyń jalpy tynysyn seziný úshin balalarǵa arnalǵan taqpaqtardan bastadyq. Ádettegi baıqaýlar sııaqty, baıqaý jarııalap, jeńimpazdardy anyqtap qana qoıǵymyz kelmeıdi. Qazir shamasy kelgen ata-ananyń balalarynyń qolynda smartfon ne planshet júredi, tıisinshe, biz de qazaq tilindegi ónimdi búgingi býynnyń qolyndaǵy dúnıesine salyp berýimiz kerek. Jumys ta osy baǵytta jalǵasyn tabatyn bolady. Baıqaý qatysýshylary qarjylyq marapat úshin qatysty dep oılamaımyn. Balalar taqyrybyna úles qosa berińizder, júldelerińiz qutty bolsyn!», - dedi Rahat Jaqsybaı.
Júldegerlerdiń esimderi:
Yntalandyrý syılyǵy: Sáken Bolysov, Gúlnar Táńirbergenqyzy men Alma Saılaýqyzy
III oryn jáne 20 000 teńge qarjylaı marapat: Mıra Sembaıqyzy, Bekarystan Nurlanuly jáne Ularbek Nurǵalymuly
II oryn jáne 40 000 teńge qarjylaı marapat: Serikbol Hasan jáne Sara Toqtamys
I oryn jáne 50 000 teńge qarjylaı marapat: Saǵadat Saǵıdollaqyzy Bas júlde jáne 75 000 teńge qarjylaı marapat: Qýat Ahetov