Almatyda erekshe baıqaý márege jetti. Bilim men ǵylymǵa boı urǵan kip-kishkentaı búldirshinder ózderiniń tyrnaqaldy zertteý jumystaryn qorǵady. Bastaýysh synyp qabyrǵasyndaǵy jetkinshekterdiń zertteýshilik qadamdaryn quptap, qanattandyrýdy kózdegen konkýrsta qazylar alqasyn tánti etken jas talanttardyń árqaısysy da marapatqa laıyq edi. Alǵashqy jeńis, alǵashqy jeńilister balalardy qýantty da, jylatty da. Sonymen birinshi oryndy «Bıdaıdyń tuzǵa tózimdiligin zertteý» eńbegi boıynsha Almatydaǵy №175 mektep-gımnazııasynyń oqýshysy Aıym Oqan aldy. «Tiri tabıǵat» nomınasııasy boıynsha birinshi oryndy osy mekteptiń 3 synyp oqýshysy Darııa Joldas «Shampınon sańyraýqulaqtary» jumysymen jeńip aldy. Al «Matematıka, ǵylym jáne tehnıka» nomınasııasy boıynsha birinshi oryn №148 mektep-gımnazııasynyń 2 synyp oqýshysy Seribaı Ilııastyń «Shahmat – ómir súrý modeli» zertteýine buıyrdy. Sońǵy jyldary «О́rleý» Biliktilikti arttyrý ulttyq ortalyǵy» AQ fılıaly Almaty qalasy boıynsha pedagogıkalyq qyzmetkerlerdiń biliktiligin arttyrý ınstıtýtynyń bastamasymen ótkizilip júrgen «Men álemdi tanımyn» atty bastaýysh synyp oqýshylarynyń zertteý jobalarynyń qalalyq konkýrsy shynynda da qyzyqty. О́mirlerindegi alǵashqy jarysqa balalar úlken qulshynyspen daıyndaldy. Máselen, osy ınstıtýttyń dırektory, pedagogıka ǵylymdarynyń doktory Raısa Sádýaqasova Qazaqstan Táýelsizdiginiń 25 jyldyǵyn merekeleý qarsańynda ótkizilgen konkýrstyń oqýshylardyń taýdaı talabyn qoldaýda ári bastaýysh synyp muǵalimderiniń kásibı sheberligin shyńdaýda mańyzy zor ekendigin aıtady. Saltanatty túrde márege jetken jarysta Raısa Adjarqyzy osynaý baıqaýǵa shákirtterin daıyndaǵan ustazdarǵa, baıqaýdy ótkizýge qoldaý kórsetken bilim berý júıesiniń qyzmetkerlerine alǵysyn bildire otyryp, júrekteri lúpil qaqqan, kózderinen úmit oty jarqyldaǵan elimizdiń eń jas zertteýshilerine bilim jolynda órleı berýine tilektestigin bildirdi. Mazmuny jańartylǵan bilim berý baǵdarlamasynyń aıasynda bastaýysh synyp oqýshylarynyń izdený qabiletin damytý maqsatynda ótkizilgen baıqaýǵa aýdandyq irikteýden ótken 59 zertteý jobalary usynylǵan. Bul saıysqa tájirıbeli mamandar, tanymal pedagog-ǵalymdar tartylǵanyn aıta ketý kerek. Máselen, «Tiri tabıǵat» nomınasııasy boıynsha qazylar alqasyna Abaı atyndaǵy Qazaq ulttyq pedagogıkalyq ýnıversıtetiniń oqytýshysy, pedagogıka ǵylymdarynyń doktory Azııa Jumabaeva, «Matematıka, ǵylym jáne tehnıka» nomınasııasy boıynsha qazylar alqasyna ál-Farabı atyndaǵy Qazaq ulttyq ýnıversıtetiniń dosenti Lázzat Orazbekova, «Men jáne meniń álemim» nomınasııasy boıynsha Qazaq memlekettik Qyzdar pedagogıkalyq ýnıversıtetiniń professory Qazyna Aımaǵambetova tóraǵalyq jasady. Endigi jerde kishkentaı «ǵalymdardyń» áleýmettik tapsyrysty sheshýge baǵyttalǵan jobalary aýdan, qala, respýblıka deńgeıinde qoldanylýy ǵajap emes. Úlken jeńisten úmit kútken bastaýysh synyptyń balalary kádimgi eresektershe qazylardyń aldynda synaq tapsyrdy. Súısinesiń. О́z taqyryptary boıynsha kórneki quraldary, zertteý jumystary, nátıjeni aıqyndaıtyn naqty dálelderi bar oqýshylardyń arasynan jeńimpazdy tańdaý tóreshilerge de ońaı bolǵan joq. Jeńimpazdardy marapattaý saltanatynda qazylar alqasynyń tóraǵasy Qazyna Aımaǵambetova baldyrǵandarǵa ǵylymnyń bıik asýlaryna jol silteıtin osyndaı mańyzdy is-sharany uıymdastyrǵan «О́rleý» BAUO» AQ fılıaly Almaty qalasy boıynsha pedagogıkalyq qyzmetkerlerdiń biliktiligin arttyrý ınstıtýtynyń basshylyǵyna rızashylyǵyn bildirdi. Aınash ESALI, «Egemen Qazaqstan» ALMATY