Osy berige deıin týrızm dese jurt shet elge, teńizge barýdy oıǵa alatyn. Bul oraıda irgemizde turǵan dalanyń tabıǵatyn, sulýlyǵyn, halqymyzdyń tarıhyna, dástúrine, ańyz-áfsanalaryna baılanysty oryndardy kórýdi, ózge jurtqa kórsetýdi kóp qaperge ala qoımaǵanymyz jasyryn emes. Qazir jergilikti týrızmge kózqarastyń ózgere bastaǵany bilinedi.
Qostanaıda «BESTkz» týrıstik operatory barlyq jumysyn búginde ishki týrızmdi damytýǵa baǵyttap otyr. Budan úsh jyl buryn jumysyn bastaǵan týrıstik operator aldymen Naýyrzym qoryǵyn kórgileri keletin qonaqtardy kóptep tartýdy qolǵa alǵan bolatyn.
Rasynda Qostanaı-Torǵaı óńirinde ekotýrızmdi damytýǵa mol múmkinshilikter bar. Bul kúnde IýNESKO-nyń Búkilálemdik mádenı jáne tabıǵı murasy tizimine enýi arqyly dúnıe júzine belgili bolyp otyrǵan qoryq týrısterdi tuma tabıǵatymen tartatynyna mamandar bás tigedi. Munda esh jerde kezdespeıtin aǵash túri, alýan túrli ósimdikter álemi, «Qyzyl kitapqa» engen janýarlar, tushy bulaqtar álemniń ár shalǵaıyndaǵy iri qalalarda tas úı men tas kósheden basqa kórgeni az, tútin jutqan jurtty qalaısha qyzyqtyrmas eken? Úsh jyldan beri ishki týrızmdi damytýǵa talpynys jasap júrgen «BESTkz» týrıstik operatory aldaǵy jyly ótetin EKSPO-2017 halyqaralyq kórmege kelgen sheteldikterge Naýyrzym qoryǵyn kórsetý úshin bıyl jazymen kóptegen daıyndyq jumystaryn júrgizdi.
«BESTkz» týrıstik operatorynyń dırektory Gúlmıra Qapenovanyń aıtýynsha, ishki týrızmdi damytýǵa jergilikti turǵyndardyń atsalysýy da qýantyp otyr. О́tken jazda Naýyrzym qoryǵyna alty baǵyt boıynsha ózderi tilek bildirgen júzqaraly týrısterdi apardy. Naýyrzym aýdanynyń ortalyǵy Qarameńdi selosyndaǵy shathananyń daıyndaǵan ulttyq taǵamdaryna týrısterdiń barlyǵynyń kóńili toldy. Al dastarqan máziri tek ishki týrızmde ǵana emes, jalpy týrızmniń sheshýshi tetikteriniń biri dese jarasady. Aldaǵy jyly EKSPO-2017 kórmesi ótetin ýaqytta týrıster keletin Naýyrzym qoryǵynda olardy qazaqtyń dástúr-saltyn kórsetetin kıiz úıleri kútetin bolady.
Sońǵy ýaqytta Torǵaı óńiriniń ishki týrızmniń mekenine aınalatynyna senim qalyptasyp keledi. Uly dalany bir kórýge árkim-aq qushtar. «Torǵaı sharshysy» degen atpen belgili bolyp otyrǵan geoglıfterdiń tabylýy da tek ishki týrızmdi damytýǵa yqpal jasap qana qoımaıdy, álem týrısteriniń Torǵaı dalasyna degen yntyzarlyǵyn arttyrary sózsiz. «BESTkz» týrıstik operatorynyń mamandary tek Torǵaı dalasy men Naýyrzym ǵana emes, Qostanaı oblysyndaǵy tanymdyq, tarıhı oryndar men tabıǵat tamashasy bar jerlerdiń barlyǵyn da týrızmdi damytýdy qamtýǵa talaptanyp otyr. Árıne, óńirdiń tabıǵat jaǵdaıyna baılanysty qıyndyqtar da joq emes. Degenmen, izdenister izsiz, nátıjesiz qalmaıtyny anyq.
– Biz Qostanaı qalasyn týrızmniń halyqaralyq mobıldik qosymshasyna qazaq, orys, aǵylshyn tilinde engizip qoıdyq. Aldaǵy ýaqytta qytaı tilinde mátin daıyndaıtyn bolamyz. Mysaly, dúnıe júziniń qaı núktesinen bolsyn, adamdar ınternet arqyly mobıldik qosymshadan Qostanaı qalasyn ashady da, qyzyqty oryndardy qaraıdy. Qazirdiń ózinde bizdiń paraqshamyzdy biraz adamnyń qaraǵany belgili boldy, – deıdi «BESTkz» týrıstik operatorynyń dırektory Gúlmıra Qapenova.
О́ńirde týrızmdi damytý jan-jaqty jumysty qajet etetin kásipkerliktiń túri ári tabys kózi ekenin osy iske talaptanǵandar álden-aq bilip otyr. Ishki týrızmdi damytýǵa muryndyq bolǵan Naýyrzym qoryǵy EKSPO-2017 kórmesi kezinde oǵan kóptiń kózin taǵy bir jetkizetin bolar.
Názıra JÁRIMBETOVA
«Egemen Qazaqstan»
QOSTANAI