Elimizde jyl saıyn bala týý kórsetkishi oń sıpatqa ıe bolyp keledi. Bıylǵy jyldyń 10 aıynyń qorytyndysy boıynsha elimizde 308 297 náreste dúnıege kelgen. Bul týraly Ortalyq kommýnıkasııalar qyzmetinde ótken baspasóz máslıhatynda QR Parlamenti Májilisiniń depýtaty, Qazaqstandaǵy Bala quqyqtary jónindegi ýákil Zaǵıpa Balıeva málimdedi, dep habarlaıdy Baq.kz.
«Qazaqstanda 5 460 449 bala bar. 2016 jyldyń 10 aıynyń qorytyndysy boıynsha 308 297 bala dúnıege kelgen. Olarǵa tıisti kóńil bólinýi kerek», - dedi depýtat.
Sonymen qatar, Zaǵıpa Balıeva aldaǵy ýaqytta balalarǵa arnalǵan halyqaralyq konferensııa ótetinin atap ótti. Onda qoǵamda sheshimin tappaǵan máseleler talqylanatyn bolady.
«21-22 qarasha kúnderi elimizde balalarǵa arnalǵan «Meıirimdi Qazaqstan» halyqaralyq konferensııasy ótedi. Onda ózekti máseleler talqyǵa salynady. Qazir 12 taqyrypty jarııaladyq. Álemniń 35 elinen jınalatyn sarapshylar osy máseleler jóninde óz oılaryn ortaǵa salady», - dedi halyq qalaýlysy.
Al QR Densaýlyq saqtaý jáne áleýmettik damý mınıstrligi Áleýmettik qyzmetter departamentiniń dırektory Ajar Tóleǵalıeva Qazaqstanda jyl saıyn bala týý kórsetkishiniń oń sıpatqa ıe bolyp kele jatqanyn, ana men bala óliminiń azaıǵanyn málimdedi.
«Elimizde jyl saıyn 400 myńnan astam sábı dúnıege keledi. Qazaqstanda týý kórsetkishi jyldan jylǵa ósip otyr. Bul kórsetkish halyqtyń áleýmettik-ekonomıkalyq jaǵdaıynyń jaqsarǵandyǵyn kórsetedi. Ekinshi – ana men balanyń ólim-jitim kórsetkishi. Ol jyl saıyn 10%-ǵa tómendep keledi. Qazaqstan osyndaı kórsetkishke jetken Orta Azııadaǵy birden bir memleket. 1990 jyldan beri ana men bala ólim-jitimi 30%-ǵa tómendedi. 2016 jyldyń 9 aıynyń qorytyndysy boıynsha ólim-jitim 8,6%-ǵa azaıǵan», - dedi departament dırektory.