Aqmola oblysyndaǵy 270 kásipker bıyl qoldanysqa engen Salyq kodeksiniń talaptarymen kelispeı otyr. Olardyń kópshiligi - jerasty sýlaryn paıdalanatyn shıpajaı ıeleri. Tabıǵı resýrsty tutyný úshin tólenetin salyqtyń, shamamen, 500 ese artýy olardy tyǵyryqqa tiregenge uqsaıdy, - dep habarlaıdy "Qazaqstan"telearnasy.
Tilshilerdiń málimetinshe, jeńildikke ıe kásiporyndar qatarynan alyp tastalǵan emdeý-saýyqtyrý nysandary endigi jerde 1 tekshe metr sýǵa 1 aılyq eseptik kórsetkish kóleminde salyq tóleýge mindetti. Al kásipkerler bolsa, ony tóleýge kópshiligimizdiń qaýqarymyz jete bermeıdi, deıdi.
Býrabaıdaǵy shıpajaılar sharýashylyq qajettilikterge jer asty sýyn paıdalanady eken. Sebebi ulttyq park aýmaǵynda ortalyqtandyrylǵan sý júıesi joq. Sondyqtan barlyq nysannyń jeke qudyǵy bar. "Jumbaqtas" shıpajaıy jylyna 5 myń tekshe metr sý tutynady. Onyń árbir tekshe metri úshin salyq tóleıdi.
"Buryn biz aılyq eseptik kórsetkishtiń 0,3 paıyzyn tóleıtinbiz. Bir jylda shamamen 32 myń teńge shyǵatyn. Qazirgi talap boıynsha biz jer astynan alyp jatqan 1 tekshe metr sýǵa 1 aılyq eseptik kórsetkish kóleminde salyq tóleýimiz kerek. Bizde bul jylyna 11 mıllıon teńge bolyp shyǵady. Ony biz kótere almaımyz", - deıdi shıpajaı dırektory Vasılıı Chervenko.
Aıta keteıik, jerasty sýlaryn paıdalanýshy mekemelerge 1 aılyq eseptik kórsetkish kóleminde mindetti tólem bekitilgen. Jáne 0,1, 0,3 jáne 25 paıyz qosymsha koefısıent eseptelip, jeńildik beriletin mekemeler tizimi bar. Alaıda shıpajaılar bul tizimnen alyp tastalǵan.
Al óz kezeginde memlekettik kirister departamentiniń bólim basshysy Erlan Qaparov Býrabaı kýrorttyq aımaǵyndaǵy shıpajaılar, demalys nysandaryna qatysty qosymsha koeffısıent qoldanylmaıtynyn aıtty. "Sebebi olar alyp jatqan jer asty sýy tikeleı kásipkerlik qyzmetke paıdalanylady. Osyǵan oraı, olar salyqty 1 aılyq eseptik kórsetkish kóleminde tóleýge mindetti", - dedi ol.
Salyqty mıllıondap tóleýge qaýqarsyzbyz degen shıpajaı basshylary jergilikti kásipkerler palatasyna aryz-ótinishterin joldady. Soǵan oraı arnaıy saraptama da júrgizildi.
Aqmola oblystyq kásipkerler palatasy dırektorynyń orynbasary Valentına Gerashenkonyń aıtýynsha, bul másele zertteldi. "Biz "Atameken" kásipkerler palatasynyń ortalyq apparatyna salyq kodeksiniń redaksııasyna ózgerister engizý, ıaǵnı jer asty sýlaryn paıdalanǵan úshin aýdarylatyn mindetti tólemniń mólsherin azaıtý týraly hat joldadyq", - dedi ol.
Búginde Ulttyq ekonomıka mınıstrliginde arnaıy jumys toby qurylyp, salyq kodeksine ózgerister engizý máselesi talqylanyp jatyr. Shıpajaı ıeleri endi soǵan úmit artyp otyr. Budan qaıyr bolmasa, kásipkerler bıznesin toqtatamyz degendi aıtady.