Qazaqstan Respýblıkasy Prezıdenti janyndaǵy Qazaqstan strategııalyq zertteýler ınstıtýty Táýelsizdiktiń 25 jyldyǵyndaǵy jetistikterdi talqylaý, ınstıtýsıonaldyq reformalardy júzege asyrý máseleleri boıynsha ózgeshe jobanyń tetigin iske qosty. Jobanyń maqsaty – el ishinde iske asyrylǵan reformalar týraly aqparattarmen qamtamasyz etý, sondaı-aq, sarapshylarmen keri baılanys ornatýdy qalyptastyrý.
Búgin «Rixos» qonaqúıinde atalǵan joba aıasynda uıymdastyrylatyn kezdesýlerdiń alǵashqysy ótti. Oǵan Ulttyq ekonomıka mınıstri Qýandyq Bıshimbaev, otandyq sarapshylar, ekonomıka salasynyń mamandary, Strategııalyq bastamalar ortalyǵy men bıznes ortanyń ókilderi keldi.
Jıynda sóz alǵan Qýandyq Bıshimbaev Táýelsizdiktiń shırek ǵasyrlyq merziminde eldiń áleýmettik-ekonomıkalyq damýyndaǵy negizgi tetikterine toqtala kele, memlekettik baǵdarlamalar men «100 naqty qadam» Ult Josparynyń júzege asyrylýy jáne Qazaqstannyń 2020 jylǵa deıingi strategııalyq damý josparyn ázirleý, onyń ishinde «100 naqty qadam» Ult josparynyń úshinshi – «Indýstrıalandyrý jáne ekonomıkalyq ósim» reformasy tóńireginde óz oıyn ortaǵa saldy. Spıkerdiń aıtýynsha, búginde bul reforma sheńberinde Ulttyq ekonomıka mınıstrligi tarapynan Qazaqstannyń salyqtyq jáne kedendik saıasatyn jetildirý boıynsha aýqymdy jumystar atqarylǵan, munyń ózi keleshekte el ekonomıkasynyń damýyna oń áser tıgizýi múmkin. Sonymen qatar, mınıstr óz sózinde júrgizilgen reformalardyń arqasynda Táýelsizdik jyldary Qazaqstan eń serpindi ekonomıkalyq úshtikke enip, el ekonomıkasy sheteldik kapıtal úshin tartymdy bola túskeninin, 25 jyl ishinde memleketke 260 mlrd AQSh dollary kóleminde sheteldik ınvestısııa quıylǵanyn jetkizdi. Qazaqstan búginde TMD elderi arasynda tikeleı ınvestısııalardyń jalpy túsimi boıynsha Reseıden keıingi ekinshi oryndy ıelengen. Budan bólek, elimiz eńbek ónimdiligin arttyrýda ónerkásip óndirisi kólemin 10,3 ese ulǵaıtýǵa qol jetkizgen.
Q. Bıshimbaevtyń sózine qaraǵanda, el ishinde júrgizilgen reformalardyń nátıjesinde jumyssyzdyq deńgeıi 1991 jylmen salystyrǵanda 2 esege deıin tómendese, kedeıshilik deńgeıi 3 paıyzdan aspaıtyn kórinedi. Sondaı-aq, mınıstr Táýelsizdik jyldary densaýlyq saqtaý men bilim berý salasyn qarjylandyrý 8,5 ese óskenin, 1300 densaýlyq saqtaý nysany salynǵanyn atap ótti.
Mınıstrliktiń deregine súıensek, densaýlyq saqtaý salasyndaǵy tıimdi jumystardyń arqasynda ana ólimi 1991 jyldan beri 5 esege, sábı ólimi 3 esege deıin azaıyp, týý kórsetkishi 1,5 esege ósken. Al eldegi ómir súrý uzaqtyǵy 68 jastan 72 jasqa ulǵaıǵan.
Láıla EDILQYZY,
«Egemen Qazaqstan»