Táýelsizdik jyldary Qazaqstannyń syrtqy saýda aınalymy 8, eksport 9, ımport 8 ese ósti. Prezıdenttiń bastamasymen turǵyn úı men ınfraqurylym salasyna ınvestısııa salýdy údetý esebinen ǵana emes, sonymen birge, el ekonomıkasyn odan ári jańǵyrtý men Qazaqstannyń tranzıttik qýatyn arttyrý arqyly ekonomıkalyq damýdy yntalandyratyn 2015-2019 jyldarǵa arnalǵan «Nurly jol» daǵdarysqa qarsy baǵdarlamasy ázirlendi. Bul týraly búgin Qazaqstan strategııalyq zertteýler ınstıýtynyń únqatysý alańynda sarapshylar qaýymdastyǵy ókilderimen ótken kezdesýde Ulttyq ekonomıka mınıstri Qýandyq Bıshimbaev aıtty.
Jıyn aıasynda mınıstr 2025 jylǵa deıingi el damýynyń strategııalyq josparynyń negizgi erejelerin tanystyrdy. Onyń aıtýynsha, bul qujat Memleket basshysynyń «Qazaqstan-2050» Strategııasy» Joldaýyn júzege asyrý maqsatynda ázirlengen. «Jańa strategııalyq mindetter jáne álemdik ekonomıkadaǵy «jedel ózgerister» ortamerzimdik ulttyq is-qımyldy jańa jaǵdaıǵa sáıkes túzetýdi jáne beıimdeýdi talap etti. Eldiń 2050 jylǵa deıingi strategııalyq damý jospary «Qazaqstan-2050» Strategııasynyń uzaqmerzimdik maqsattaryna qol jetkizý jolynda júzege asyrylýy tıis basymdyqtar men bastamalardy belgilep berdi. 2025 jylǵa deıingi strategııalyq damý josparyn júzege asyrýdyń nátıjesi 7 ulttyq jetistik arqyly kórinis tabýy tıis», – dedi vedomsvo basshysy.
Sondaı-aq, ol qujat aıasynda ortasha ómir súrý uzaqtyǵyn 75 jasqa deıin uzartýǵa múmkindik beretin halyq densaýlyǵyn jaqsartýǵa baǵyttalǵan sharalar jalǵasa beretinin, barlyq qalalar ortalyqtandyrylǵan sýmen qamtamasyz etiletinin, al aýyldardy ortalyqtandyrylǵan sýmen qamtamasyz etý 80 paıyzǵa jetkiziletinin aıtty.
Láıla EDILQYZY,
«Egemen Qazaqstan»