Amerıkalyq zertteýshi ǵalym, energetıka, halyqaralyq saıasat jáne ekonomıka salasyndaǵy tanymal qaıratker, jazýshy, Pýlıtser syılyǵynyń laýreaty Denıel Ergınniń «TheQuest» dep atalatyn kitaby qazaq tilinde jaryqqa shyqty. Bul D.Ergınniń qazaq tiline aýdarylǵan ekinshi kitaby. Buǵan deıin, naqty aıtqanda, 2013 jyly onyń «ThePrize» kitaby «QAZYNA. Munaı, aqsha, bılik úshin kúrestiń búkilálemdik tarıhy» degen ataýmen aýdarylǵan bolatyn. Avtordyń osy «ThePrize» kitaby Pýlıser syılyǵyna ıe bolǵan. Al búgin tanystyrylymy ótken «ENERGIIа kózderin izdestirý jolynda resýrstar shaıqasy, jańa tehnologııalar jáne energetıka bolashaǵy» dep atalǵan eńbegi osy kitaptyń jalǵasy.
Avtordyń aıtýyna qaraǵanda, bul eńbek 5 jyldyń zertteýlerdiń negizinde jazylǵan. Onda qazirgi energetıkalyq álem men onyń bolashaqty qurylymdaýǵa qatysty dınamıkasynyń tolyq taldaýy kórsetilgen.
«Men úshin bul kitapty qazaq tildi oqyrmanǵa usyný asa mańyzdy. Bul geosaıasat, qaýipsizdik, tehnologııa, ınnovasııalar men munaı landshaftyndaǵy energetıkalyq kúshterdiń sońǵy jıyrma jyldaǵy zertteýi», - deıdi D.Ergın.
Kitapty qazaq tiline aýdarýǵa «Astana» Halyqaralyq qarjy Ortalyǵy qoldaý kórsetken. Jalpy redaksııasyn Qaırat Kelimbetov basqarǵan.
«Astana» halyqaralyq qarjy ortalyǵy basqarýshysy Q.Kelimbetovtiń aıtýynsha, bul munaı ındýstrııasynyń tarıhy, al D.Ergın energetıka jáne halyqaralyq saıasat pen ekonomıkadaǵy bedeldi sarapshy retinde asa mańyzdy derektermen bólisedi.
«Bizdiń oqyrmandarymyz úshin kitap asa qundy, sebebi Qazaqstan munaı óndirýshi el retinde 100 jyldan astam tarıhqa ıe. Sondyqtan resýrstardy tıimdi paıdalaný alǵysharttaryn jaqsylap túısiný kerek», dedi Q.Kelimbetov.
Onyń aıtýynsha, bul kitap energetıkalyq naryqtaǵy qazirgi ahýaldy ózgertetin jańa energııa kózin tabýǵa áser etetin «qıratýshy tehnologııanyń» paıda bolý múmkindigimen de qyzyqty. Osylaısha qazaq tildi kitap qory oqyrmanyn qýantyp, sırekteý kezdesetin ekonomıkalyq taqyryptaǵy taǵy bir eńbekpen tolyqty.
Dınara BITIKOVA,
"Egemen Qazaqstan".