QR Premer-Mınıstriniń orynbasary - QR Aýyl sharýashylyǵy mınıstri Asqar Myrzahmetov Inalca Eurasia ıtalııalyq kompanııasy ókilderimen kezdesti. Bul týraly QR AShM baspasóz qyzmetinen habarlady.
Qazirgi tańda 5 ınstıtýsıonaldyq reformany júzege asyrý jónindegi 100 naqty qadamnyń 61-shi qadamy «Et óndirisi men óńdeýdi damytý úshin strategııalyq ınvestorlardy tartý» boıynsha Mınıstrlikpen Inalca Eurasia kompanııasynyń (Sremonini Group atynan) arasynda Almaty oblysyndaǵy et klasterin qurý ınvestısııalyq jobasyn damytý máselelerin sheshýde birqatar jumystar atqarylýda.
Mal bordaqylaý alańdarynyń qýattylyǵy 10000-nan 20000-ǵa deıin mal basyn qamtyp, et kombınatynda mal soıý kórsetkishi aptasyna 1500-2000 basty quraıtyn bolady. Aǵymdaǵy jyldyń qańtar aıynda Inalca Eurasia kompanııasy elimizdiń mal sharýashylyǵy salasyndaǵy iri kásiporynynyń biri - Aqtóbe oblysyndaǵy «Aktep» JShS-men memorandýmǵa qol qoıdy. Osy kelisim aıasynda Aqtóbe, Qostanaı, Batys Qazaqstan oblystarynda jalpy qýattylyǵy bir mezgilde 44 myń bas maldy qamtı alatyn bordaqylaý alańdaryn salý úshin tiginen ıntegrasııalanǵan kompanııa qurýdy, sonymen qatar, et kombınatynyń qýatyn 20 myń tonna et jáne et ónimderine deıingi shekke ulǵaıta otyryp jańǵyrtý jumystaryn júrgizý qarastyrylǵan.
Aıta keteıik, Cremonini 1963 jyly Italııada qurylǵan jáne búginde ondaǵy azyq-túlik óndirisi salasyndaǵy iri toptyń biri. 2008 jyly atalǵan konsernniń tabysy 2007 jylmen salystyrǵanda 6,6 %-ǵa kóterilip, 2,2 mlrd. evrony qurady. Tabystyń 41 %-y óndiris segmentine (sıyr eti, shujyq jáne jeńil tamaq óndirisine), 41 %-y azyq-túlikke bólinse, 18%-y qoǵamdyq tamaqtaný kásiporynyn uıymdastyrýǵa jumsaldy. EBITDA 5%-ǵa kóterilip 133 mln. evro bolsa, shoǵyrlandyrylǵan tabys 2008 jyly 39 mln. evrony qurady. ( 2007 jyly 12,7 evrony quraǵan bolatyn).
Búgingi tańda Cremonini Group Eýropadaǵy asa mańyzdy azyq-túlik tobynyń biri jáne de úsh bıznes baǵytta jumys jasaýda: óndiris, taratý jáne qoǵamdyq tamaqtaný. Atalǵan top iri qara mal etin óndirý men et ónimderin qaıta óńdeý boıynsha Italııa aýmaǵynda kósh bastap tur («Inalka DjıBıEs» jáne «Montana»). Sonymen qatar, azyq-túlik ónimderin qoǵamdyq tamaqtaný kásiporyndaryna jyljytý men taratý boıynsha da aldyńǵy orynda («MARR»).
Budan bólek, bul top poıyzdar bortynda, vokzaldarda, áýejaılar men avtomobıl joldarynda qoǵamdyq tamaqtaný boıynsha konsessııalarǵa ıe (Chef Express) jáne de kompanııa «steıkhaýz» (Roadhouse Grill) jelisinde de kórinis berip tur. О́ndiris salasyndaǵy halyqaralyq is-qımyldar negizinen Eýropa, Reseı jáne birqatar Afrıka elderiniń (Angola, Kongo Demokratııalyq Respýblıkasy, Kongo Respýblıkasy, Aljır, Nıgerııa) aınalasynda órbýde. Kompanııa poıyzdar bortynda qoǵamdyq tamaqtanýdy uıymdastyrý boıynsha Eýropadaǵy aıtýly kóshbasshy bolyp tabylady jáne óziniń enshiles kompanııalarymen birge Fransııa, Ispanııa, Brıtanııa jáne Belgııada da basymdyqqa ıe.