2017 jyly Qazaqstannyń biryńǵaı dıstrıbıýteri arqyly dári-dármekterdi satyp alýdan 11 mlrd. teńge únemdeledi dep boljanyp otyr. Bul týraly «Atameken» ulttyq kásipkerler palatasynyń Sybaılas jemqorlyqqa jáne kóleńkeli ekonomıkaǵa qarsy is-qımyl jónindegi keńes otyrysynda «SK-Farmasııa» JShS basshysy Nurjan Álibaev málim etti, dep habarlaıdy QazAqparat.
«SK-Farmasııa» AQ 2016 jyly barlyq qajetti dári-dármekterdi tolyqtaı satyp aldy. Olardyń baǵalary 2014 jylǵy deńgeımen qaldy. Tıisinshe, 4,6 mlrd. teńge únemdeldi. Mysaly, kórshi Reseı eli dári-dármekterdi satyp alýǵa ketetin qarajattyń kólemin ulǵaıtýǵa májbúr. Bizde bolsa, baǵa burynǵy deńgeıde qalyp otyr. Biryńǵaı dıstrıbıýter ortalyqtandyrylǵan satyp alýdy júzege asyrý jáne baǵalardyń turaqtylyǵy boıynsha óziniń tıimdiligin kórsetti», - dep atap ótti ol.
Onyń sózinshe, 2014 jyly biryńǵaı dıstrıbıýterdiń ústemesi 10 paıyzdy quraǵan. 2015 jyly 4-shi toqsanda onyń deńgeıi 8,5 paıyzǵa tómendetildi.
«1 qańtarda onyń deńgeıin 8 paıyzǵa tómendetý jóninde usynyspen shyqtyq. Sonymen qatar byltyr kompanııa basshylyǵy óziniń bonýstarynan bas tartty, bul shamamen - 50 mıllıon teńge. 2017 jyly 1 qańtardan bastap, biz ústeme paıyzdy 7 paıyzǵa deıin kemitemiz. Bul óz kezeginde memleketke de, kásipkerlerge de salynatyn júktemeni azaıtady. Bıyl kelesi jylǵa arnalǵan satyp alý aldyn ala jasaldy. 2017 jylǵa arnalǵan dári-dármekter men buıymdardyń 92 paıyzy satyp alyndy, jyl sońyna deıin 8 paıyzyn satyp alý qaldy. Aldyn ala málimetter boıynsha, únem 10,8 mlrd. teńgeni quraıdy», - deıdi N.Álibaev.
Kompanııa basshysynyń sózi boıynsha, búgingi tańda satyp alynǵan 896 dárilik zattyń 462-si - otandyq ónim. Onyń úlesi 50 paıyzdan asady. 2017 jyly otandyq ónimderdi satyp alýdyń dınamıkasy 2010 jylmen salystyrǵanda, 6 esege ósip, 30 mlrd. teńgeden astamdy qurady.