Sańlaqtardyń sýreti poshta markasynda

Ulttyq Olımpıada komıteti «Qazposhta» aksıonerlik qorymen birlese otyryp, Ortalyq kommýnıkasııalar qyzmetinde 2016 jylǵy Rıo Olımpıadasynyń jeńimpazdary men júldegerlerine arnalǵan poshtalyq markalardy tanystyrdy. «Sport» toptamasyna kiretin «Rıo-de-Janeırodaǵy XXXI Olım­pııalyq oıyndar» taqyry­byndaǵy markalarǵa mór basý saltanatyna «Qazposhta» AQ syrtqy baılanystar boıynsha basqarýshy dırektory Áset Turysov, Ulttyq Olımpıada komıtetiniń atqarýshy dırektory Serik Qasqabasov, Rıo Olımpııadasynyń altyn jáne kúmis júldegerleri Dmıtrıı Balandın, Nıjat Raxımov, Vası­lıı Levıt pen Ádilbek Nııazym­betov qatysty. «Tórt jyl saıyn jankúıerler Olımpıada oıyndaryndaǵy sport sańlaqtarymyzǵa jeńis tilep, medaldar kútedi. Sport­shylarymyz halyqtyń úmitin aqtaýda. Jeńim­paz­darymyzdyń qurmetine markalardy shyǵarýdy josparlap, retteýshilerge jiberdik. Jalpy, sportshylarǵa arnalǵan markalardy osyǵan deıin de shyǵarǵanbyz. Aldynda Gennadıı Golovkınge arnalǵan markalyq blokty aına­lymǵa engizdik», – dedi «Qaz­poshta» AQ syrtqy baılanystar boıynsha basqarýshy dırektory Áset Turysov. Ulttyq Olımpıada komı­teti­niń atqarýshy dırektory Serik Qasqabasov óz sózinde sport­shy­larǵa qoldaý kórsetip otyrǵan «Qazposhtaǵa» alǵys bildirdi. «Sportshylarymyzdyń jetistikterine arnap poshtalyq markalar shyǵarý barlyq qazaq­standyqtar úshin mańyzdy. Jeńim­pazdarymyzdyń eńbek­qorly­ǵymen kelgen Rıodaǵy jeńis­ter otan­dastarymyzdyń maqta­nyshy», – dedi S. Qasqabasov. «Qazaqstan Respýblıkasy Ulttyq bankiniń Banknot fabrıkasy» Respýblıkalyq memlekettik kásipornynda basyp shyǵarylǵan poshtalyq markalarda 2016 jylǵy Rıo Olımpıadasynyń altyn jáne kúmis júldegerleri Danııar Eleý­sinov, Dmıtrıı Balandın, Nıjat Raxımov, Gúzel Manıýrova, Jazıra Jap­parqul, Vasılıı Levıt, Eldos Smetov, Ádilbek Nııazymbetov beınelengen. Markalardyń taralymy – 40 myń dana, belgilengen baǵasy – 200 teńge. Aıdar О́risbaev, «Egemen Qazaqstan»