Taıaý kúnderde 25 jyldyq mereıtoıy keńinen atalyp ótkeli otyrǵan Táýelsizdiktiń qazaqqa jáne qazaqstandyqtarǵa bergen paıdasy, jaqsylyǵy shash-etekten. Muny júreginde ımany, aýzynda táýbesi bar árbir adamnyń moıyndary haq. Árıne, kópshilik bolǵan soń túrli minezdi adamdar bolady, onyń ústine adam pende jaqsylyqqa boıyn tez úıretip, bola túsken ústine bola tússe deıdi emes pe.
Shyndap kelgende, Táýelsizdiktiń 25 jylyndaǵy Qazaqstannyń júrip ótken joly da «tar jol, taıǵaq keshýden» turǵanyn aıtqan jón. Rasynda, osy shırek ǵasyr ishinde Qazaqstanǵa birneshe ret álemdik ekonomıkalyq jáne qarjylyq daǵdarysty basynan keshýine týra keldi. Ásirese, jol basyndaǵy memlekettiń jaǵdaıyn sozylmaly dertke uqsastyrýǵa tolyq bolatyn. Qazyna qaltasynda kók tıyn bolmady, kásiporyndardyń kópshiligi kóterem maldyń kúıin keship jatty, ınflıasııa deńgeıi 1000 paıyzdan asyp, aýyl adamdary kádimgi kir sabyndy bir qoıǵa satyp alýǵa májbúr boldy. Bir sózben aıtsaq, bul kezeńde ekonomıkanyń jaǵdaıy, adamdardyń rýhanı dúnıesi kúızelistiń eń aýyr sátterin basynan ótkerýine týra keldi. Osynaý kúrdeli jaǵdaıdan saıası partııalardyń, úkimettik emes uıymdardyń jáne qoǵamdyq birlestikterdiń, qarapaıym azamattardyń belsendi qoldaýymen qazaqtyń Tuńǵysh Prezıdenti Nursultan Nazarbaevtyń júrgizgen saýatty ishki jáne syrtqy saıasatynyń arqasynda shyǵa aldyq.
Qazaqstan búginde óte jaýapty sheshimder qabyldanyp jatqan biregeı elge aınaldy. Atap aıtqanda, jahandyq qarjylyq jáne ekonomıkalyq daǵdarysqa qaramastan, memleket eshbir abyrjymaı, istiń baıybyna tereń úńile otyryp, jaǵdaıdy ýysyna ustaı bildi. Sóıtip, qas-qaǵym sátte elimiz múmkindiginiń jáne kemel kelesheginiń sımvolyna aınalǵan múldem jańa elorda – Astana salyndy, ekonomıkamyz meılinshe qýatty ári ashyq bola tústi. Jan basyna shaqqanda ishki jalpy ónim (IJО́) 18 esege ósip, Ortalyq jáne Shyǵys Eýropa elderiniń deńgeıine jetti. «Nurly jol» memlekettik baǵdarlamasy óte tabysty jumys isteýde. Osy rette, asa iri naryqtardy jalǵaıtyn strategııalyq kóliktik dáliz bolyp sanalatyn, jalpy uzyndyǵy 8 myń shaqyrym «Batys Eýropa – Batys Qytaı» avtokólik jolynyń 2800 shaqyrymdy quraıtyn qazaqstandyq bóliginiń qurylysy aıaqtalyp kele jatqanyn aıtý lázim. Búgingi kúnniń ózinde osy baǵyttaǵy tranzıttik júk tasymalynyń kólemi eki eseden astam ósip otyr.
Erekshe atap óterlik taǵy da bir jaıt, Qazaqstan ınvestısııalyq áleýeti myqty, bul salada tartymdylyǵy joǵary el retinde tanylyp keldi. Máselen, sońǵy on jyl ishinde elimizdiń ekonomıkasyna 200 mıllıard dollardan astam sheteldik ınvestısııa quıylǵan. Osy oraıda, memleketimiz ınvestısııalardy taý-ken, munaı men gaz salalaryna ǵana emes, óńdeý, qaıta óńdeý sektorlaryna da baǵyttap otyrǵanyn atap ótken jón. Sondaı-aq, Qazaqstan osy jyldary óz ekonomıkasyn álemdik naryqqa beıimdep, ıntegrasııalaý maqsatynda tájirıbe jınaqtaı bildi. Nátıjesinde, Dúnıejúzilik bank tobynyń jetekshi basylymy «Doing Business-2017» baıandamasyna sáıkes, Qazaqstan álemdik reıtıngte 35-shi oryndy ıelenip, «Doing Business-2016» kórsetkishindegi 51-shi orynmen salystyrǵanda 16 satyǵa joǵarylady. Osylaısha, bıznes-ahýaldyń qolaılylyǵy deńgeıi turǵysynan Qazaqstan reıtıngte Ekonomıkalyq yntymaqtastyq jáne damý uıymynyń Belgııa, Italııa, Izraıl, Grekııa, Túrkııa memleketteriniń aldyn orasa, Eýrazııalyq ekonomıkalyq odaq áriptesteriniń ishinde top jaryp, mereıimiz ósti, belesimiz bıiktedi.
Elimiz halyqaralyq arenada da aýyz toltyryp aıtatyndaı tabystarǵa qol jetkizdi. Qazir ulttyq múddelerimizdi qorǵaı otyryp, Dúnıejúzilik saýda uıymynyń múshesi atandyq. Memleket basshysy osyǵan baılanysty qazaqstandyqtarǵa joldaǵan Úndeýinde: «DSU-ǵa múshe bolý – kúlli Qazaqstannyń jeńisi. Bul – elimizdiń jahandyq ekonomıkanyń bólinbes bólshegi retinde moıyndalýynyń aıǵaǵy», – dep erekshe atap ótti. Osyǵan oraı, Astanada ótetin halyqaralyq EKSPO-2017 kórmesine 105 memlekettiń qatysýǵa tilek bildirýin kezdeısoq deı almaısyń.
Árıne, men ıdealıst emespin jáne barlyq adamdy birdeı baqytqa keneltý ońaı emestigin túsinemin, alaıda, ynta bolsa jaqsy nátıjege jetýge bolatyndyǵyna senimdimin. Bir nárse aıqyn. Dańqty ultqa, «Máńgilik Elge» aınalý jáne eń baǵaly da asyl qundylyq – Táýelsiz Qazaqstandy kózimizdiń qarashyǵyndaı saqtap, bolashaq urpaqqa amanat etý – ózimizdiń qolymyzda.
Kenjebolat JOLDYBAI,
saıasattanýshy