Qyzylordada qoǵam qaıratkeri, professor Abylaı Aıdosovtyń 80 jyldyǵyna arnalǵan sharalar ótti. Qorqyt ata atyndaǵy Qyzylorda memlekettik ýnıversıtetinde Abylaı Aıdosov atyndaǵy aýdıtorııa ashyldy. Qala kósheleriniń birine ǵalymnyń aty berildi. Sondaı-aq, ýnıversıtet qabyrǵasynda Aıdosovtyń ómiri men shyǵarmashylyǵyna arnalǵan ǵylymı-tájirıbelik konferensııa ótti.
Oblys ákimi Qyrymbek Kósherbaev konferensııada sóz sóılep, Abylaı Aıdosovtyń aımaq damýyna qosqan úlesi týraly aıtty.
- Abylaı Hangereıuly «Jaqaevshylar» qozǵalysynyń mártebesin kótere bilgen myqty ıdeolog boldy. Onyń qataryna tek qana gektaryna 40 sentnerden joǵary kúrish ónimin alǵandar qosyldy. Abylaı Aıdosov Aral teńiziniń ekologııalyq jáne áleýmettik jaǵdaıynyń zerttelýin álemdik deńgeıge kóterdi. Onyń usynysy boıynsha 2004 jyly shildede «Aral óńiri ekologııasyn áleýmettik zertteý» ortalyǵy quryldy,- dedi oblys ákimi.
Konferensııa barysynda Aıdosovtyń áriptesteri, dostary jáne shákirtteri ǵalymnyń eńbek joly men Otanyna degen mahabbaty, qarapaıymdylyǵy týrasyndaǵy estelikterimen bólisti. Sondaı-aq ǵalymnyń ómiri men shyǵarmashylyǵy týraly derekti fılm kórsetildi.