Memleket basshysy «Astana EKSPO-2017» ulttyq kompanııasy» AQ basqarmasynyń tóraǵasy A.Esimovti qabyldady. Bul týraly Aqordanyń baspasóz qyzmeti habarlady.
Kezdesýde A.Esimov Elbasyǵa «EKSPO-2017» halyqaralyq kórmesine daıyndyq barysynyń qorytyndy kezeńi týraly baıandady.
«Astana EKSPO-2017» ulttyq kompanııasy» AQ basqarmasynyń tóraǵasy qurylys jumystary kestege sáıkes júrgizilip jatqanyn habarlady. Alǵashqy nysandar tapsyrylýǵa daıyn, sonyń ishinde jalpy kólemi 285 myń sharshy metr bolatyn halyqaralyq pavılondar bar.
– Fransııa, Germanııa, Qytaı, Túrkııa jáne Vengrııa elderiniń ókilderine pavılondar berilip te qoıdy. Alda taqyryptyq pavılondar qurylysyn aıaqtaý mindeti tur, – dedi A.Esimov.
Elbasy EKSPO-2017 nysandarynyń is-shara ótkennen keıin de paıdalanylýy qajettigine, sondaı-aq kórme jumysyna qatysatyn eriktilerdi daıyndaý, mádenı is-sharalar ótkizý, respýblıka óńirleriniń atsalysýy, halyqaralyq kórmege otandyq týrısterdi tartý máselelerine nazar aýdardy.
Nursultan Nazarbaevqa jyl sońyna deıin Qazaqstan pavılonynyń qurylysyn aıaqtaý jáne ony tıisti taqyrypqa sáıkes mazmundyq turǵydan tolyqtyrý baǵytynda atqarylyp jatqan jumystar týraly baıandaldy.
A.Esimov EKSPO-2017 kórmesi aıasyndaǵy barlyq is-shara jumys rejimi boıynsha júzege asyrylyp jatqanyn atap ótti. Búginde eriktilerdiń 3 myńy daıyndyqtan ótken, qosymsha taǵy 1,5 myń eriktini iske tartý kózdelýde.
Memleket basshysy quqyqtyq tártipti qamtamasyz etý jáne halyqaralyq kórmege qatysýshylar men qonaqtardy ornalastyrý máselelerine erekshe toqtaldy.
«Astana EKSPO-2017» ulttyq kompanııasy» AQ basqarmasynyń tóraǵasy búgingi tańda is-sharaǵa qatysýshylarǵa beriletin 1 374 páterdiń daıyn ekenin habarlady.
Memleket basshysy búkil álemde bolyp jatqan kúrdeli ekonomıkalyq úderisterge qaramastan mańyzdy halyqaralyq is-shara ótkizýdi josparlap otyrǵanymyzdy aıtty.
Sońynda Elbasy kórmeni laıyqty ótkizip, sodan keıin Qazaqstanda onyń jetistikterin paıdalaný qajettigin atap ótti.
– Bizge sheteldik qatysýshylardyń kórmede kórsetetin jańa ınnovasııalyq tehnologııalaryn barynsha paıdalaný qajet, – dedi Nursultan Nazarbaev.