Jaqynda Almatydaǵy «Ǵylym ordasynyń» «Ǵylym sardarlary» klýbynda Ulttyq ǵylym akademııasynyń 70 jyldyq mereıtoıyna jáne kórnekti ǵalym, Ulttyq ǵylym akademııasynyń prezıdenti, akademık, Qazaqstan Respýblıkasy Halyqaralyq joǵary mektep akademııasynyń, Halyqaralyq ınjenerlik akademııasynyń jáne Nıý-Iork akademııasynyń akademıgi, hımııa ǵylymdarynyń doktory, professor Murat Jurynovtyń ǵylymı shyǵarmashylyǵyna arnalǵan kezekti saltanatty otyrys ótti.
Merekelik is-sharaǵa elimizdiń jetekshi ǵalymdary men UǴA akademıkteri, ǵylymı-zertteý ınstıtýttarynyń jetekshileri, JOO rektorlary men professorlary, jas ǵalymdar qatysty.
Saltanatty shara aıasynda «Ǵylym ordasynyń» uıymdastyrýymen Ulttyq ǵylym akademııasynyń 70 jyldyq mereıtoıyna arnalǵan foto-kórme saltanatty túrde ashyldy. «Ǵylym ordasy» memlekettik kásipornynyń bas dırektory Baýyrjan Tóltaev pen akademık Murat Jurynov kórme lentasyn qıdy.
Kórmede otandyq ǵylymnyń damý kezeńderi boıynsha fotolar usynyldy: Akademııanyń qurylý kezeńinen úzindiler, onyń alǵashqy músheleri, Ulttyq Ǵylym akademııasynyń birinshi prezıdenti, ǵylymı-zertteý ınstıtýttarynyń alǵashqy basshylary, Ulttyq ǵylym akademııasynyń akademıkteri degen taqyryptarda fotolar qoıylǵan. Sonymen qatar, Ulttyq ǵylym akademııasynyń 70 jyldyq mereıtoıyna arnalǵan kitap kórmesi uıymdastyryldy. Kórme qazaq ǵylymynyń 70 jylda qol jetken jetistikterin dáriptedi. Eldiń rýhyn asqaqtatar uıymnyń bul mereıtoıy ǵylym salasyndaǵy talaı jetistigimizdi aıqara ashyp kórsetetin aıtýly kún ekeni ras. Saltanat sońy án men kúıge ulasty. Kúmbirlegen kúı men myń buralǵan bı sony ańǵartsa kerek.
Saparbaı PARMANQULOV,
«Egemen Qazaqstan»
ALMATY