A.Pýshkın atyndaǵy Shyǵys Qazaqstan oblystyq kitaphanasynda Láıla Ahmetovanyń «1941. Brest bekinisi. Qazaqstan» atty kitabynyń tusaýkeseri ótti. Atalǵan sharaǵa óńir zııalylary, qalamgerler men jýrnalıster jáne jastar qatysty.
Sondaı-aq, kitaptyń tusaýkeserin Shemonaıha, Besqaraǵaı, Abaı, Jarma, Aıagóz jáne Glýbokoe aýdandyq kitaphanalary men Úrjar, Maqanshy aýdandaryndaǵy aýyldyq kitaphanalar, Kúrshim aýdanynyń Terekti aýyldyq kitaphanasy onlaın júıesi arqyly kórýge múmkindik aldy. Avtormen kezdesýge atalǵan kitapqa esimderi engen qaharman jaýyngerlerdiń týǵan-týystary da keldi.
Láıla Ahmetova bul kitabynda aty ańyzǵa aınalǵan Brest bekinisinde soǵys aldyndaǵy kezeń men 1941 jyldyń maýsym aıynda bolǵan oqıǵalardy baıandaıdy. Zertteý eńbegi 1941 jyly fashısterdiń alǵashqy soqqysyn qarsy alǵan qamalda qyzmet etkenderdiń tizimi jarııalanýymen jáne ári qaraıǵy taǵdyrlary tarqatylýymen qundy. Olardyń arasynda shyǵysqazaqstandyqtar da bar.
– Qyrqynshy jyldyń aqpan aıynda Semeıden ásker qataryna attanǵandar eshelonmen Brest-Lıtovskige baǵyt alyp, olardyń bir bóligi Brest qamalyna bólindi. Bıyl 1 mamyrda men Brest bekinisin qorǵaýǵa qatysqan 556 qazaqstandyqtyń esimin taptym. Olardyń ishinde 88 semeılik jáne 10 shyǵysqazaqstandyq jaýynger bar. Árıne, izdeý jumystary áli jalǵasady. О́ıtkeni, qamaldy qorǵaýǵa qatysqandar munymen shektelmeıdi. Sol sebepti bul birinshi kitap retinde jaryqqa shyqty. Máselen, Jarma aýdanynyń Balajal kentiniń ózinen 30 adam Brest qamalyn qorǵaýǵa qatysqan. Men arhıv qujattarynan tek ekeýin ǵana taptym, – deıdi ál-Farabı atyndaǵy Qazaq ulttyq ýnıversıtetiniń professory Láıla Seısenbekqyzy. Kitap avtorynyń aıtýynsha, 44-atqyshtar polki boıynsha tabylǵan kóptegen qujattarǵa sáıkes, polktiń basym bóligi Shyǵys Qazaqstan oblysynan jasaqtalǵan. Alaıda, urysqa qatysýshylardyń kópshiligi tutqynǵa túskendikten, kóp jyldar boıy olardy Uly Otan soǵysynyń qatysýshylary sanatyna qospaǵan.
Láıla Seısenbekqyzy oqýshylar ata-babalarynyń soǵysta jasaǵan erlikterinen habardar bolýy úshin atalǵan kitaptyń óńir mektepterinde kómekshi qural retinde paıdalanylýyn jáne Pýshkın men Abaı atyndaǵy oblystyq kitaphanalarda esimderi jazylǵan shyǵysqazaqstandyq jaýyngerlerdiń tizimine týǵan-týystarynyń ún qatyp, eńbektiń odan ári tolyǵa túsýi úshin qolda bar derekterimen bólisýin surady. Kezdesýge kelgen maıdangerlerdiń urpaqtary men aǵaıyndary kitaptan Balǵybaev, Dmıtrıenko, Popov jáne basqa da jaýyngerlerdiń esimin taýyp, qýanysyp qaldy. Bul rette kitap avtory Uly Otan soǵysynyń qaharmandaryn birigip izdeýge baǵyttalǵan top quryp, birge jumys isteýge, osylaısha izdeýsiz ketken jerlesterdiń erlikke toly ómirin pash etýge shaqyrdy. Aıta ketelik, Uly Otan soǵysy jyldarynda Shyǵys óńiriniń ózinen 109 Keńes Odaǵynyń Batyry shyqqan bolatyn.
О́SKEMEN