soltústikqazaqstandyqtar taǵy bir bıik mejeni baǵyndyrdy
Elbasy Maǵjan eline kelgen bıylǵy jumys saparynda «Soltústik Qazaqstan oblysy áleýmettik-ekonomıkalyq damý qarqyny jóninen qazir elimizdiń ozyq óńirleriniń qatarynda. Jeri qunarly, bul óńirde bıdaı ǵana emes, maıly daqyldar da shyǵymdy», dep ishki áleýetine joǵary baǵa bergen bolatyn. Shynynda da, astyqty ólke osyndaı baǵalaýǵa ábden laıyq. Aýyl sharýashylyǵy eńbekkerleri el Táýelsizdiginiń 25 jyldyq mereıtoıyna tolymdy tartý jasady.
Sala ardagerleri, eńbek ozattary qatysqan alqaly jıynda kúzgi oraq jumystary qorytyndylanyp, gektar berekeliligi 18 sentnerden aınalǵany málim etildi. Bul – Otan qambasyna 5,8 mıllıon tonna astyq quıyldy degen sóz. 1991 jyldary túsimdilik 6,4 sentnerdi qursa, búgingi kúni 2,5 ese ósip otyr. Memlekettiń zor qoldaýy, agrotehnıkalyq sharalardyń tıimdi qoldanylýy arqasynda óńirde azyq-túlik qaýipsizdigin qamtamasyz etýdiń sharalary jan-jaqty qarastyrylyp keledi.
Búginde oblys aýmaǵynda 861 aýylsharýashylyq kásiporny, 3653 seriktestik pen sharýa qojalyǵy, jalpy syıymdylyǵy 6,6 mıllıon tonnany qamtıtyn 52 astyq qabyldaý orny jumys isteıdi. Aýylsharýashylyq ónimderin qaıta óńdeý baǵytynda da ıgi izdenister, jemisti ister az emes. Jyl basynan beri 1,1 mıllıard teńgeniń 11 jobasy paıdalanýǵa berilip, 131 jańa jumys oryndary ashyldy. 1 mıllıon 46 myń tonna aýylsharýashylyq ónimderi eksporttalyp, syrtqy naryq kókjıegi keńeıe tústi.
Kúzgi oraq naýqany qyrda egin ósirgen dıqan qaýymynyń mańdaı teriniń, qajyrly eńbeginiń jemisin aqtap, kúsh biriktirse, alynbaıtyn asýdyń joqtyǵyn, ortaq maqsat jolynda tolymdy tabystarǵa jetýge bolatynyn taǵy bir márte dáleldep berdi. Gektar berekeliligin 21,7 sentnerden aınaldyrǵan Aqqaıyń aýdany jeńimpaz retinde tanylyp, 15 mıllıon teńgeniń sertıfıkatyn ıelendi. Maǵjandyqtarǵa 10 mıllıon teńgeniń, jambyldyqtarǵa 5 mıllıon teńgeniń sertıfıkaty tartý etildi. Keń dalany eńbek dúbirine bólep, agroónerkásip salasynyń damýyna óz úlesterin qosqan bir top mehanızator, kombaınshyǵa «Eńbek ardageri», «Aýyl sharýashylyǵynyń úzdigi» medaldary men tósbelgileri, qurmet gramotalary men alǵys hattar tabystaldy.
– Bıyl Úkimet tarapynan 800 mıllıon teńge sýbsıdııa bólindi. 877 mıllıon teńge ınvestısııa tartyldy. «Astrahanskoe» JShS ónimdilikti 35 sentnerden asyryp, rekordtyq ónim aldy,–dedi sóıleskenimizde Aqqaıyń aýdany ákiminiń orynbasary Erkin Jaqypov.
Qoshemetke bólengenderdiń biri «Mámbetov jáne K» komandıttik seriktestiginiń mehanızatory Ardaq Saǵıtov aýyl sharýashylyǵy salasyna 31 jyl ǵumyryn arnap, mańdaı terin tógip keledi. Buryndary «Nıva», «Enıseı» kombaındaryn tizgindese, endi «Esil-763» tehnıkasyn urshyqsha úıiredi. Kostanaıda shyǵarylatyn bul kombaınnyń artyqshylyqtary kóp. Eń bastysy, teriskeıdiń aýa raıyna laıyqtalyp jasalǵan, deıdi ol. Jambyl aýdany «NTS-Agro» seriktestiginde bas agronom qyzmetin atqaratyn Sáken Qaıyrjanov jastar aýylǵa kóptep kelse, aǵa býynnyń izin basyp, jolyn jalǵastyrsa degen ıgi tilegin jetkizdi.
О́mir ESQALI,
«Egemen Qazaqstan»
Soltústik Qazaqstan oblysy