Máskeýde ótken eń úzdik týrıstik baǵyttar aıqyndalatyn «National Geographic Traveler Awards - 2016» baıqaýynyń qorytyndysy boıynsha Qazaqstannyń astanasy arnaıy «Bolashaqtyń qalasy» atalymyn jeńip aldy, dep habarlaıdy QazAqparat.
«Men elimizdiń astanasy úshin osy aıtýly atalymdy jeńip alǵanyma qýanyshtymyn. Onyń ústine Astana kelesi jyly «EKSPO-2017» halyqaralyq kórmesin uıymdastyryp, onda álemniń túkpir-túkpirinen qonaqtar men týrıster keledi. Biz barlyqtaryńyzdy qonaqqa shaqyramyz»,-dedi «Astana EKSPO-2017» UK» AQ-nyń týrızmdi nasıhattaý departamenti dırektorynyń orynbasary Roza Asanbaeva jeńimpazdardy quttyqtaý saltanatty rásiminde.
«National Geographic Traveler Awards» júldesi jyl saıyn beriledi. «National Geographic Traveler» jýrnalynyń altynshy júlde jeńimpazdaryn irikteý 24 atalym boıynsha júrgizildi. Júlde oqyrmandarǵa unaǵan basty týrıstik baǵyttardy, servıster men týrıstik kompanııalardy anyqtaıdy. Baıqaýdyń ereksheligi sol, munda dástúrli ádilqazylar alqasy joq. Jeńimpazdy saıahatshylardyń ózderi anyqtaıdy. Daýys berý ashyq jáne nat-geo.ru saıtynda júrgiziledi. Nomınasııany da saıt qoldanýshylary taǵaıyndaıdy», - dedi «National Geographic Traveler» jýrnalynyń bas redaktory Olga Iаkovına.