Eń jedel saıttardyń ózi aqparat taratýda messendjerler men áleýmettik jelilerdiń jyldamdyǵyna ilese almaı otyr. Bul týraly búgin elordada ótip jatqan О́ńirlik BAQ forýmynda elimizdiń Aqparat jáne kommýnıkasııalar mınıstri Dáýren Abaev aıtty, dep habarlaıdy QazAqparat.
Mınıstrdiń aıtýynsha, búgingi kúni elimizde 3 myńǵa jýyq aqparat quraldary tirkelgen bolsa, sonyń 80 paıyzyn aımaqtyq resýrstar quraıdy. Osynyń ózi óńirdegi mass-medıanyń yqpaly kúshti ekendigin kórsetedi. Alaıda búgingi ýaqyt bul salaǵa aıryqsha kózqarasty talap etip otyr. Onyń birden-bir sebebi - jańa tehnologııalardyń qarqyndy damýy men ınternettiń qanat jaıýy.
«Basqasyn aıtpaǵanda, áleýmettik jelilerdiń ózi dástúrli aqparat quraldaryn naryqtan yǵystyrýda. Eń jedel saıttardyń ózi aqparat taratýda messendjerler men áleýmettik jelilerdiń jyldamdyǵyna ilese almaı otyr. Búginde kez kelgen adam kez kelgen oqıǵany telefon arqyly tikeleı efırde taratatyn dárejege jetti. О́zderińiz muny jaqsy bilesizder», - dedi mınıstr.
Osy rette ol osyndaı joıqyn básekede utylmaý úshin aımaqtyq medıanyń aldynda bir ǵana jol bar ekendigin basa aıtty.
«Ol - zamanǵa saı kúrdeli ózgerister jasaý. Qazirgi kúnniń talaby aqparatty jedel taratý ǵana emes oqyrmanǵa ne qajet ekendigin dál taýyp, aýdıtorııamen tikeleı baılanys ornata bilý. Sonymen qatar eldiń múddesin, halyqtyń muń-muqtajy men basqa da ózekti máselelerdi tereń saraptap, memleket saıasatyn, baǵyt-baǵdaryn halyqqa tıimdi jetkizý kerek. Qoryta aıtqanda, qoǵamdaǵy yqpalyn saqtap qalý úshin, óńirilk medıanyń deńgeıi joǵary, sózi ótimdi bolýy kerek. Mine, osyǵan qatysty aldymyzda úlken is-sharalardy júzege asyrý mindeti tur», - dedi Abaev.
Aıt keteıik, sharaǵa Parlament depýtattary, Prezıdent ákimshiliginiń ókilderi, respýblıkalyq jáne óńirlik BAQ basshylary, jýrnalısteri, ortalyq jáne jergilikti atqarýshy organdardyń ókilderi, Reseıdiń tanymal telejýrnalısteri qatysýda. Úsh sessııamen ótetin forým barysynda qazaqstandyq jýrnalıster men qoǵamdy alańdatatyn ózekti máseleler talqylanýda.