Búgin el táýelsizdiginiń 25 jyldyǵyna oraı jolǵa shyqqan «Táýelsiz Qazaqstan» poıyzy Oral qalasyna keldi, dep habarlaıdy QazAqparat.
Respýblıkalyq sharaǵa qatysýshylardy Aq Jaıyq jurtshylyǵy temir jol vokzalynan qurmetpen qarsy aldy. Osyndaǵy alańda ótken saltanatty mıtıngide BQO ákiminiń orynbasary Baǵdat Azbaev mártebeli meımandarǵa qosh keldińiz aıtyp, el táýelsizdiginiń 25 jyldyǵyna oraı qolǵa alynǵan mundaı sharalardyń máni zor ekendigin atap kórsetti.
«Jıyrma bes jyl ishinde elimiz qol jetkizgen kóptegen tabystardy baıandap, Elbasynyń «100 naqty qadam» Ult josparyn, «Máńgilik el» ıdeıasyn halyqqa jetkizý maqsatynda belgili qoǵam qaıratkerleri, birqatar mınıstrlikter ókilderi men túrli sala mamandary, Májilis depýtattary kelip otyr. Olar turǵyndarmen kezdesip, elimizde atqarylǵan naqty isterdi málim etip, óz oı-tolǵamdarymen bólispek», - dedi B.Azbaev.
«Elimizdiń batys qaqpasy sanalatyn Oralǵa kelgenimizge qýanyshtymyz. Táýelsizdigimizdiń 25 jyldyq torqaly toıyn atap óter tusta Astanadan Elbasy tapsyrmasymen, Qazaqstan halqy Assambleıasynyń qoldaýymen shyqqan «Táýelsiz Qazaqstan» poıyzy halyq pen bıliktiń, el men úkimettiń arasyndaǵy kópir ispettes. Biz halyqpen birge bolaıyq, áleýmettik máseleleri bolsa, sony shesheıik dep keldik», - dedi «Táýelsiz Qazaqstan» poıyzy shtabynyń jetekshisi, tarıh ǵylymdarynyń kandıdaty, L.Gýmılev atyndaǵy EUÝ halyqaralyq qatynas kafedrasynyń professory Ámirjan Álpeıisov.
Atalmysh poıyzdyń saparyna baılanysty Oralda 18-19 qarasha kúnderi kezdesýler men basqa da is-sharalar josparlanǵan. Sonyń ishinde mamandar áleýmettik, quqyqtyq, densaýlyq saqtaý, bilim berý, aýyl sharýashylyǵy, kásipkerlik máseleleri, zeınetaqy tólemderi, tutynýshylar quqyǵyn qorǵaý boıynsha turǵyndardy qabyldap, keńes beredi. Mysaly, oblystyq densaýlyq saqtaý basqarmasynan túsken málimetke qaraǵanda, oblystyq dıagnostıkalyq ortalyqqa bilikti mamandardyń aldyna aýrýy kúrdeli adamdar kelip, aqyl-keńes almaqshy. Sol sekildi jýyrda Oraldaǵy kafelerdiń birinde tamaqtan ýlanyp, salmonellez aýrýy anyqtalǵan turǵyndar moraldyq jáne materıaldyq turǵyda óz quqyqtaryn qorǵaý úshin zań qyzmetkerleriniń kómegine júginbekshi.