Qazaqstannyń aýyr atletıkadan jasóspirimder men jetkinshekter qurama komandalary Tokıoda bolyp ótken Azııa chempıonatynda jaqsy óner kórsetti. Qurlyq birinshiligi respýblıkada talantty tolqynnyń ósip kele jatqanyna kóz jetkizdirdi. Bizdiń elimiz qurama komandasynyń bas jattyqtyrýshysy Alekseı Nımen áńgimemiz osy tóńirekten óris aldy.
– Alekseı Gennadevıch, japon astanasyndaǵy jetistik dopıng daýy teńseltip turǵan qazirgi kezde kóńilge úmittiń shoǵyn úrlep jibergendeı jaqsy áser etip otyr.
– Iá, bul Qazaqstannyń shyn máninde de álemdegi aýyr atletıkasy damyǵan derjavalardyń birinen tabylatynyn taǵy bir márte dáleldep bergen oqıǵa boldy. Sol jarysqa barǵan jeti sportshymyzdyń altaýy júldeli oryndardan kórindi. Medaldar qunyn saraptasaq, chempıonatta qorjynymyzǵa 4 altyn, 1 kúmis jáne 1 qola júlde tústi. Bizge alǵashqy altyn medaldy jasóspirim Arystanbek Jahansha áperdi. Ol 69 kıloǵa deıingiler shoǵyrynda 283 kg (128+155) salmaqpen aldyna jan salmady. Tap osy salmaqta taǵy bir atletimiz – jetkinshek Albert Lınder 315 kılomen (142+173) Azııanyń eń myqtysy atandy. Budan keıingi altyn medal 77 kıloda jetkinshek Mıhaıl Makeevtiń enshisine jazyldy. Ol buǵan jıyntyqta 321 kg (143+178) ziltemirdi kóterý arqyly jetti. Qola medaldy osy salmaqtaǵy jasóspirim Amanjol Serikbol aldy. Medaldar aýylynan tys qalǵan 56 kılo salmaqtaǵy Igor Sonǵa osy belesten kórinýge 1 ball ǵana jetpedi. Ol qossaıysta 246 kg (110+136) salmaqty eńserdi. Qyzdar tobynda altyn medal 69 kg salmaqtaǵy Anjela Chalkarovaǵa buıyrdy. Ol saıysta 188 kg (87+101) salmaqty baǵyndyrdy. Al +75 kılo salmaqta Nadejda Nogaı 251 kg (113+138) kórsetkishimen kúmis medaldy qanaǵat tutty.
– Chempıonat qarsańynda atletter aldyna qandaı mindet qoıyldy?
– Senesiz be, olarǵa chempıonatta qalaıda jeńiske jetý kerek degen sııaqty joǵary mejeli mindet qoıylǵan joq. Olarǵa berilgen tapsyrma Qazaqstan chempıonaty kezinde qol jetkizgen kórsetkishterinen tómen nátıje kórsetpeý ǵana boldy. Men úshin olardyń basqa elderdegi qarsylastarymen teketireste ózderin qalaı ustaı alatyndaryn baıqap, kórý bárinen mańyzdy sanaldy. Sebebi, jas atletterimiz osy jaǵynan tájirıbesiz bolatyn. Sonyń arqasynda ósip kele jatqan jas býynymyzdyń jarys barysyndaǵy minez-qulyqtary men áleýetterine biraz qanyǵyp qaldyq.
– Buryn Azııada birden tórt altyn medal alý bolǵan emes edi.
– Durys aıtasyz. Aldaryna aıtarlyqtaı maqsat qoıylmaǵasyn jas sportshylarymyz Tokıoda erkin óner kórsetti. Psıhologııalyq jaǵynan alǵan azattyq olardyń óz qabiletterin barynsha asha bilýlerine múmkindik berdi. Sóıtip, biz óz tarıhymyzda birinshi ret qurlyqta tórt birdeı chempıon shyǵardyq. Al buǵan deıingi bıigimiz Dohada úsh altyn medal alý bolsa, endi sodan asyp túsip otyrmyz. Eger aldymyzǵa qalaıda bes altyn medal alý mindetin belgilep alǵanda, oǵan da jete alatyn edik. Biraq burynnan bar jaraqatynan tolyq aıyǵa qoımaǵan Nadejda Nogaıdy artyǵyraq kúsh jumsaýdan ózimiz saqtandyrdyq. Onyń Rıoda óz dárejesinde óner kórsete almaýyna da osy jaraqaty kedergi keltirip edi. Sondyqtan oqıǵanyń aldyna túspeı, atletti aqyryn daıyndaı bergendi jón kórdik.
– Bul atletterdiń arasynan qazirden bastap eresekter tobynda óner kórsetýge daıyndary bar ma?
– Bar. Máselen, 2017 jyldyń basynan Albert Lınder men Nadejda Nogaı ulttyq qurama sapyna alynady. Jalpy, osy topty bolashaqtyń komandasy retinde qarastyryp otyrmyz. Bular – dál qazirgi tańda elimizde óz qatarlarynyń aldy. Basynda Tokıoǵa 7 qyz, 8 ul qalpynda tolyq qurammen barmaqshy bolǵanbyz. Sońynan tek kórsetkish kórsetetinderin ǵana apardyq. Qalǵandary jeltoqsannyń basynda Qyzylordada ótetin Qazaqstan Kýbogy úshin jarysqa daıyndalady. Jalpy, jas atletterimizdiń bul jolǵy tabysyna rızamyn.
Áńgimelesken
Serik PIRNAZAR,
«Egemen Qazaqstan»