quqyqtyq kemshilikterdi joıýdy qajet etedi
«Atameken» UKP janyndaǵy Sybaılas jemqorlyqqa jáne kóleńkeli ekonomıkaǵa qarsy is-qımyl jónindegi keńestiń kezekti otyrysy ótip, onda kepildendirilgen tegin medısınalyq kómektiń kólemi aıasynda alynatyn medısınalyq tehnıkalar men osy maqsattaǵy buıymdardy jáne dárilik zattardy satyp alý salasyndaǵy sybaılas jemqorlyqqa qarsy kúres júrgizýdiń jaı-kúıi qaraldy.
Otyrysqa jetekshilik etken keńes tóraǵasy Qaıyrbek Súleımenov eldegi dári-dármek taratý salasyna arnaıy júrgizilgen monıtorıng nátıjesinde birqatar uıymdyq-quqyqtyq kemshilikter oryn alǵandyǵyn málimdep, mundaı jaǵdaı ekonomıkanyń osy segmentinde básekelestikti shekteý men sybaılas jemqorlyq kórinisterine negiz bolatynyn atap ótti. Sonymen qatar, jıynǵa onlaın-júıe arqyly qatysqan kásipkerler qaýymy da bul pikirdi qoshtaı otyryp, Bas prokýratýraǵa Densaýlyq saqtaý jáne áleýmettik damý mınıstrliginiń básekelestikti shekteıtin jáne jekelegen zańdy tulǵalarǵa artyqshylyqtar beretin keıbir buıryqtaryna qarsylyq bildirýdi biraýyzdan maquldady.
Negizinen, bildeı bir mınıstrliktiń atyna mundaı ýáj aıtýdyń sebebi de joq emes sekildi. Onyń mánisi alqaly basqosýda baıandama jasaǵan keńes múshesi, Parlament Májilisiniń depýtaty Ivan Klımenkonyń keltirgen derekterimen ashyla tústi. Baıandamashynyń sózinshe, qoldanystaǵy dáriler men medısınalyq tehnıkaǵa baǵa belgileý jáne olardy tirkeý tártibindegi kemshilikter kásipkerlerdiń satyp alýlarǵa qatysýyna kedergi jasaıtyn kórinedi. «Máselen, baǵany tirkeý úderisi kásipkerlerdiń quqyqtary men bostandyqtaryn júzege asyrýǵa baǵyttalǵan memlekettik fýnksııalardy iske asyrý nysany bolyp tabylatynyna qaramastan, bul fýnksııalar memlekettiń kórsetiletin qyzmetter tizilimine engizilmegen jáne quqyqtyq turǵyda rettelmegen. Sol sııaqty, bizdiń zertteýimiz Formýlıarlyq komıssııanyń jumysy týraly aqparattyń bolmaýy sybaılas jemqorlyq táýekelderiniń damýyna yqpal ete alatyn quqyqtyq vakýýmdy quraıtyndyǵyn bildirdi. Al dempıngke qarsy is-qımyldy reglamentteýdegi quqyqtyq kemshilik otandyq taýar óndirýshilerge zalal keltirip, ádiletsiz básekelestiktiń qalyptasýyn týyndatatyndyǵynan habar beretindeı», – dedi depýtat.
Depýtat tarapynan aıtylǵan mundaı synǵa ún qatqan mınıstrlik ókili, Dári-dármekti aqparattyq taldaý ortalyǵynyń bólim basshysy Záýresh Mýshanova qazirgi kúni tıisti mekemeler dári-dármek salasynda halyqaralyq sheńberde moıyndalyp, tájirıbesi artqan konsaltıngtik kompanııalar keńesine júginip jatqandyǵyn alǵa tartty. «Mysaly, kásipker ózi shyǵarǵan dárilik ónimin bizge tirkeýge alyp kelgen kezde óz taýarynyń baǵasyn naqtylap berý júıesin iske qosý baǵytynda izdenýdemiz. Sonymen qatar, olar ónimniń naryqtaǵy baǵasyna qatysty joǵary-tómen dep pikir bildirip, taldaý júrgizý quqyna da ıe bolmaq. Bul, ásirese, dári-dármektiń alypsatarlyq saldarynan qunynyń shekten tys sharyqtaýyn tómendetýde tıimdiligin kórsetedi degen senimdemiz», – dedi ol.
Nurlybek DOSYBAI,
«Egemen Qazaqstan»