Ombýdsmen salasyndaǵy qyzmetimiz oń baǵalandy

Jeneva qalasynda (Shveısarııa Konfederasııasy) Qazaqstan Respýblıkasyndaǵy Adam quqyqtary jónindegi ýákil (Ombýdsmen) Asqar Shákirov BUU-nyń Azaptaýlarǵa jáne qatygez, adamgershilikke jatpaıtyn nemese ar-namysty qorlaıtyn qarym-qatynas jáne jazalaýdyń basqa da túrlerine qarsy konvensııasyna Fakýltatıvtik hattama qabyldanýynyń 10 jyldyǵyna arnalǵan konferensııaǵa jáne birqatar sharalarǵa qatysty. Is-shara barysynda Fakýltatıvtik hattamaǵa qatysýshy memleketter azaptaýlardy jáne qatygez qarym-qatynasty aldyn alý boıynsha jahandyq bastamalardy, sondaı-aq, týyndap jatqan syn-qaterlerge qatysty elderdiń kúsh-jigerlerin shoǵyrlandyrý máselelerin talqylady. Qazaqstannyń Ombýdsmeni árip­tes­terine Qazaqstandaǵy azaptaýlardy bol­dyrmaý salasynda qol jetkizilgen je­tis­tikter týraly habarlady. 2014 jyl­dan bastap bizdiń elimizde áreket etetin «Ombýdsmen+» pishimindegi Ulttyq aldyn alý (UAT) tetigi tańdalǵan modeliniń tıim­diligin kórsetti, ol pándik, negizdi jáne ózekti usynystar ázirleýge, meke­me­lerdiń ákimshiligimen, jergilikti, son­daı-aq, ortalyq memlekettik organ­darmen jemisti ózara árekettesýge múm­kindik beredi jáne tıisinshe jabyq me­ke­me­ler­degi jaǵdaıdy jaqsartýǵa áserin tı­gi­zýde. UAT-tyń 2,5 jyl jumys isteýi ke­zin­de oǵan qatysýshylar 1262 monıtorı­ng ótkizdi, UAT-tyń mandatyna 3000-nan astam ishki ister organdarynyń, qor­ǵa­nys, densaýlyq saqtaý, bilim berý, ult­tyq qaýipsizdik mekemeleri men uıymdary kiredi. Halyqaralyq sarapshylar Qazaq­stan­nyń óz halyqaralyq mindet­te­me­lerin ım­plementteýine oń baǵa berdi, osyǵan baı­lanysty UAT-tyń azaptaýlardy bol­dyrmaýdaǵy erekshe róli jáne onyń jal­py múmkindikteri atap ótildi. Quqyq qorǵaý qurylymdarynyń ókil­deri qazaqstandyq UAT tájirıbesi post­keńestik keńistikte tájirıbe almasý úshin úlgi retinde qarastyrylýy múmkin dep sanaıdy. Azaptaýlarǵa jáne qatygez, adam­ger­shi­likke jatpaıtyn nemese ar-na­mys­ty qorlaıtyn qarym-qatynastar men ja­zalaýdyń basqa da túrlerine qar­sy konvensııaǵa Fakýltatıvtik hat­tamaǵa sáıkes, azaptaýlardy boldyrmaý baǵy­tyn­da udaıy únqatysyp otyrý, ıaǵnı óza­ra árekettesý mańyzdy. Konferensııanyń jumysyna, son­daı-aq, Qazaqstan Respýblıkasynyń Bi­rik­ken Ulttar Uıymy Bólimshesi men Jeneva qalasyndaǵy (Shveısarııa) bas­qa da halyqaralyq uıymdar janyn­da­ǵy Turaqty ókili J.Aıtjanova qa­tysty, dep habarlady Qazaqstan Res­pýb­lı­ka­syn­daǵy Adam quqyqtary jónindegi ýá­kil­ apparatynyń baspasóz qyzmeti.