Sonaý 2000 jyldyń qazanynda el Prezıdenti óziniń jyl saıyn jasaıtyn Joldaýynda áleýmettik mańyzy joǵary jobalardy júzege asyrýmen aınalysatyn ÚEU-ǵa arnalǵan grant júıesin jetildirýdiń qajettiligi týraly aıtqan bolatyn.
Sodan beri Tuńǵysh Prezıdent Qorynyń qarjylyq qoldaýymen elimizdegi 200-den astam qoǵamdyq uıymnyń jumysyna naqty kómek berildi. Úkimettik emes uıymdar men Úkimet arasyndaǵy áriptestik oń nátıjesin berip, kúni búginge deıin 9 mlrd teńge qarajatty quraıtyn áleýmettik jobalar júzege asyrylǵan. Osy Joldaýdan keıin Almaty qalasyndaǵy bastamashyl top ÚEU-nyń memlekettik mekemelermen jáne halyqaralyq uıymdarmen ózara iskerligin, yntymaqtastyǵyn arttyrý maqsatynda dıalog alańynyń qurylýyna muryndyq bolyp, birneshe is-shara ótkizgen bolatyn. О́ıtkeni, elimizdegi úkimettik emes uıymdardyń jumysy áli de bolsa ashyq emes, memlekettik áleýmettik tapsyrys durys júrgizilmegen, basqa úkimettik uıymdarmen baılanysy jetilmegen jáne eń bastysy, qoǵamdyq salanyń jumysyna qyzyǵatyn adamdar joqtyń qasy. Mine, osy máseleler jınaqtala kele, elimizde alǵash ret ÚEU jármeńkesi men forýmyn uıymdastyrýǵa sebep boldy. Áleýmettik jobalar men ıdeıalardy iske asyrýǵa baǵyttalǵan bul jármeńke ÚEU-ǵa tıimdi bolǵaly tur. Kelesi jyldan bastap tabysty jumys istegen úkimettik emes uıymdarǵa arnaıy syıaqy taǵaıyndalmaq. Táýelsizdiktiń 25 jyldyǵyna oraı uıymdastyrylǵan úkimettik emes uıymdardyń halyqaralyq jármeńkesinde málim bolǵan bul jańalyq áleýmettik salalarǵa sony serpin bermek.
Halyqaralyq jármeńke men forýmdy ótkizip otyrǵan «Aqparattyq-resýrstyq ortalyqtyń» esebinshe, Almatyda 500 úkimettik emes uıym jumys isteıdi. Bul uıymdardyń basym bóligi ártúrli áleýmettik toptardyń múddesin qorǵasa, taǵy bir úlken bóligi densaýlyq saqtaý, jastar saıasatyn qoldaý jáne taǵy basqa baǵyttardyń jumysyna qozǵaý salyp, ilgeriletýge arnalǵan. Forýmda 25 jyl buryn qurylǵan, Táýelsizdikpen túıdeı qurdas Special Olympics uıymynyń jumysy kópshilikke úlgi retinde usynyldy. Osy ýaqyt aralyǵynda talaı múmkindigi shekteýli balalardyń emdelip, shıpa tabýyna, aıaǵynan turýyna kómektesip, elimizde ǵana emes, shetelde ótetin baıqaýlardan jeńimpaz bolyp oralýyna ıgi yqpalyn tıgizgen. Qoǵamdyq uıymnyń taǵy bir ókili Lıýbov Chervonnyh ózderi ashqan ortalyqta 800 balanyń tirkeýde turǵanyn, olardyń basym bóligi ınternat, túzetý mektepteriniń tárbıelenýshileri ekenin aıtady. Al, olardyń maqsaty, sport arqyly balalardyń qoǵamǵa beıimdelýine jaǵdaı jasaý eken.
Forým-jármeńkege qatysqan Din isteri jáne azamattyq qoǵam vıse-mınıstri Abzal Núkenov: «Biz naqty áleýmettik jobalarmen aınalysatyn uıymdarmen jumys isteýge ázirmiz. Osy múddemen jumys isteıtin basqa salalardy da umytpaımyz. Ol úshin granttyq, syıaqylyq arnaıy jobalar qarastyrylǵan», deıdi.
Úkimettik emes uıymdardyń halyqaralyq forýmy elimizdiń ár óńirinen kelgen 200-ge jýyq belsendi ókildiń basyn qosty. Olar búgingi qoǵamda áleýmettik ınnovasııanyń damyp, azamattardyń belsendiligi men bastamashyldyǵynyń artyp kele jatqanyna rızashylyq bildirdi. Jármeńke-forýmnyń aıasynda kórmeler, trenıngter, sheberlik sabaqtary uıymdastyryldy.
Aıgúl AHANBAIQYZY,
«Egemen Qazaqstan»
ALMATY