Máskeý túbindegi shaıqastyń 75 jyldyǵyna oraı 18 qarasha kúni Almatyda «28 panfılovshylar» kórkem fılminiń tusaýkeseri ótti, dep habarlaıdy egemen.kz «QazAqparatqa» silteme jasap.
«28 panfılovshy» (Sankt-Peterbor) táýelsiz stýdııasy jáne Reseı Federasııasy Mádenıet mınıstrligi, QR Mádenıet jáne sport mınıstrligi men Sh.Aımanov atyndaǵy «Qazaqfılm» AQ qatysýymen túsirilgen fılmdi Astanada eki eldiń óńiraralyq yntymaqtastyǵy forýmynda Qazaqstan men Reseı prezıdentteri – Nursultan Nazarbaev pen Vladımır Pýtın kórgen bolatyn.
Almatyda ótken fılmniń tusaýkeserine Mádenıet jáne sport mınıstri Arystanbek Muhamedıuly, general Ivan Panfılovtyń nemereleri – Aıgúl men Alýa Baıqadamovalar qatysty. Fılmdegi oqıǵa 1941 jyldyń kúzinde bolǵan. Jazbasha derek boıynsha 1941 jyldyń 16 qarashasynda general I.V.Panfılov qolbasshylyq etken 316-shy atqyshtar dıvızııasynyń 28 sarbazy Dýbosekovo razezin qorǵap, Máskeýge bet alǵan nemistiń tank batalonyn toqtatady. Sıýjet tolyǵymen keńes sarbazdarynyń erligine arnalǵan. «Bul Reseı men Qazaqstannyń qatysýymen halyqtyń qarajatyna túsirilip jatqan alǵashqy joba.
Ol erekshe nazardy talap etedi. Reseı mádenıet mınıstri Vladımır Medınskııge jerlesterimizdiń erligin jyly qabyldaǵany úshin alǵys bildiremin. Árıne, rejısser Andreı Shalopaǵa da alǵysym sheksiz. Ol tarıhty janymen súıetin prınsıpshil kisi», – dedi A.Muhamedıuly. Fılmniń ssenarısi, prodıýseri men teń rejısseri Andreı Shalopa kartına kınoteatrlarda kórsetilip bolǵan soń ony ınternet arqyly tegin júktep alýǵa bolatynyn aıtty.