Ońtústik Qazaqstan oblysynyń ákimi Janseıit Túımebaev Ázerbaıjan Respýblıkasynan kelgen delegasııa ókilderimen kezdesý ótkizdi. Mártebeli meımandardy Ázerbaıjan Respýblıkasynyń Qazaqstandaǵy Tótenshe jáne О́kiletti elshisi Rashad Mammadarov bastap keldi, dep habarlady oblys ákiminiń baspasóz qyzmeti.
Sondaı-aq, atalǵan top quramynda Qazaqstandaǵy Ázerbaıjannyń ishki ister mınıstrligi ókili Nasımı Shıkarov pen Ázerbaıjan kásipkerler odaǵynyń tóraǵasy Gıýndýz Mammadlı boldy.
Ekonomıkalyq yntymaqtastyqty nyǵaıtýǵa baǵyttalǵan kezdesýde aımaq basshysy Ońtústikke arnaıy at basyn burǵan qadirmendi qonaqtarǵa alǵysyn bildirip, ázerbaıjandyq ınvestorlardyń qatysýymen bolyp jatqan jáne bolashaqtaǵy birlesken jobalar jaıyn tanystyrdy. Sondaı-aq, jıynda oblystyń aýyl sharýashylyq salasymen qatar, kásipkerlik, týrızm baǵytyndaǵy josparlary men jetistikteri týraly áńgime órbidi.
«Túbi bir túrki tildes elderdiń biri – Ázerbaıjan halqy men qazaq eli tarıhy bite qaınasyp, tereńde jatqan baýyrlas ulttar. Sondyqtan, qos memlekettiń kez kelgen sala boıynsha qoıan-qoltyq aralasyp, jumys isteýi zańdy. Ázerbaıjandyq kásipkerlerdiń bastamasymen qolǵa alynǵan óńirimizdegi birqatar óndiris oryndarynyń bolýy osy týysqandyq qatynastyń jemisi dep bilem. Ári bul ıgi baılanystyń odan ári nyǵaıyp, jalǵasatynyna senimim kámil», dedi J.Túımebaev.
Kezdesý qorytyndysy boıynsha qos tarap arnaıy jumys tobyn quryp, naqty usynystar men jobalar baǵytynda iske kirisetin bolyp kelisti. Sonymen birge, ákim elshi myrzaǵa oblys ortalyǵy – Shymkent qalasy men Ázerbaıjannyń bir shaharyn «baýyrlas qalalarǵa» aınaldyrý usynyn jetkizdi. Bul usynysty qup kórgen R.Mammadarov osy ıdeıa negizinde jumys isteýge daıyndyǵyn málimdedi.
Jalpy, 2016 jyldyń 9 aılyq kórsetkishi boıynsha Qazaqstan men Ázerbaıjan elderiniń arasyndaǵy taýar aınalymy 112,1 mln dollardy qurady, bul ótken jylmen salystyrǵanda 47,4 paıyzǵa kóp. Sondaı-aq Ońtústik óńirde ázerbaıjandyq ınvestorlardyń qatysýmen jumsaq jáne keńselik jıhazdar jobalary jumys isteıdi. Bul kásipke salynǵan ınvestısııa kólemi 3,8 mlrd teńgeni quraıdy.