Ońtústik Qazaqstan oblysynyń ákimi Janseıit Túımebaevtyń tóraǵalyǵymen oblys ortalyǵy – Shymkent qalasynyń áleýmettik-ekonomıkalyq jaǵdaıyn damytý máselelerine arnalǵan semınar-keńes bolyp ótti. Jıynǵa Túrkııa astanasy – Ankara qalasy meriniń orynbasary Ramazan Kabasakal men OQO basqarma basshylary men olardyń orynbasarlary, Shymkent qalasy ákimi Ǵ.Ábdirahymov pen ákim orynbasarlary jáne bólim basshylary qatysty, dep habarlaıdy oblys ákiminiń baspasóz qyzmeti.
Otyrysta Shymkent shaharynyń zaman talabyna saı kórikti bolýy úshin álemniń aldyńǵy qatarly qalalarymen tájirıbe almasý mańyzdy ekendigine toqtalǵan óńir basshysy R.Kabasakaldy osy semınarǵa óz tájirıbesimen bólisý úshin arnaıy shaqyrǵanyn aıtty.
Uzaq jyldar Ankaranyń merııasynda qyzmet atqarǵan tájirıbesi mol qonaq Túrkııa astanasynyń kemeldengen kezeńi jóninde semınarǵa qatysýshylar aldynda baıandama jasady. Tórt myń jyldyq tarıhy bar Anadoly eliniń astanasy sońǵy shırek ǵasyrda álemdegi damýy erekshe qarqyn alǵan qalalar qatarynda. Ankaranyń 1923 jyly 5 myńnan astam ǵana turǵyny bolsa qazirgi tańda, ondaǵy halyq sany 5,5 mln.ǵa jetkeni tekten-tek emes. Semınarda Ankara mýnısıpalıtet meriniń orynbasary atalǵan qalany álemniń ozyq shaharlarynyń qataryna qosýdaǵy tarıhyn baıandady.
«Qazirgi tańda Ankarada aýmaǵy 210 ga bolatyn 1027 ǵımarattan turatyn álemdegi eń úlken sońǵy úlgidegi dısneılend salynyp jatyr. Bul da óz kezeginde týrısterdiń artýyna óz septigin tıgizeri sózsiz», degen qala meriniń orynbasary shahardyń jylyna 10-12 mln týrıstti qabyldaýǵa múmkindigi bar ekenin alǵa tartty.
Osylaısha, Ankara men Shymkenttiń baýyrlas qalalar bolǵandyqtan bir-birimen tájirıbe almasýy kerek degen R.Kabasaqal Shymkent qalasynyń ekonomıkalyq jáne áleýmettik salasynyń damýyna barynsha kómek qolyn sozýǵa daıyndyǵyn málimdedi.
Jıyn barysynda qos qalanyń qarym-qatynasyn kúsheıte otyryp, Ankaranyń damý josparyn ońtústikke de paıdalaný kerektigine toqtalǵan oblys ákimi arnaıy delegasııa quramyn jasaqtap, tájirıbe almasý saparyn uıymdastyrý qajettigin aıtty.
Shymkent qalasyn damytýdaǵy osynaý usynystardy ońdy qabyldaǵan qala ákimi Ǵ.Ábdirahymov tıisti usynystar negizinde birlese jumys isteýge daıyn ekenin jetkizdi.