Búgin Astana qalasynadaǵy Balalar kitaphanasynda belgili qalamger, jazýshy, Qazaqstan Jazýshylar odaǵynyń múshesi Janbolat Bashardyń «Qabir ústindegi zulmat» dep atalatyn jańa kitabynyń tusaýkeseri ótti.
Sharany memlekettik syılyqtyń ıegeri Nesipbek Aıtuly kirispe sózben ashyp, avtordyń shyǵarmashylyq joly týraly jáne jaryq kórip otyrǵan jańa týyndy jaıly kósheli pikirler aıtty.
Sondaı aq, saltanatty jıynda Eýrazııa Ulttyq ýnıversıetiniń professory, belgili ǵalym, jazýshy Serik Negımov, Halyqaralyq «Alash» ádebı syılyǵynyń ıegeri, aqyn Abzal Bóken, ádebıettanýshy Aıgúl Kemelbaeva, jazýshy Qaıyrbek Sádýaqasov, Astana qalasy ákimdiginiń til basqarmasynyń tóraǵasy Tileýǵalı Qyshqashbaev, jýrnalıst Qambar Ahmetov, aqyn Ilııas Muqaı sóz sóılep Janbolat Bashardyń jańa týyndysy týraly oı pikirlerimen bólisti.
Janbolat Bashardyń sońǵy ýaqyttarda jazǵan «Qabir ústindegi zulmat» atty ádebı shyǵarmasynda, otyzynshy jyldary qazaq halqynyń basyna tóngen qýǵyn-súrgin men asharshylyq qurbandarynyń jantózgisiz azaby, zulmat jyldardaǵy halyqtyń qaıǵy-qasireti sýrettelgen. Keńestik dáýirdiń otyzynshy jyldarynda bolǵan saıası ozbyrlyqqa qarsylyq kórsetken kóterilister qaza jerinde az bolmaǵan. Sonyń biri - Qaraǵandy oblysynyń Aqtoǵaı aýdany aımaǵynda, el ishinde «ýyq kóterilisi» dep atalyp ketken, Toqyraýyn kóterilisi. Bul týraly kezinde eshteńe jazylmady, aıtylmady. Elimiz táýelsizdik alǵan soń shyndyqtyń beti ashylyp, kónekóz qarııalarymyz tam-tumdap aıtyp, estelikter jaza bastady. Avtor sol bir zulmat jyldardy shyǵarma ózegine aınaldyryp, eldiń eńsesin ezgen saıası ozbyrlyqqa qarsylyq jasaǵan Jabaıdyń Sádýaqasy syndy el azamattarynyń aqyryp atqa qonýy, el basyna túsken ashtyq náýbetiniń jantózgisiz qasireti, shynaıy sýrettelip, oqyrmandy beıjaı qaldyrmaıdy. Sonymen birge, kitapqa jazýshynyń sońǵy ýaqytta jazǵan áńgime hıkaıattary engen. «Peri men Perishte, «Aıǵana», «Ańshynyń ajaly», «Úreı», «Soǵystan qalǵan syz» taǵy basqa búgingi kúnniń ómir órnegin qaýzaıtyn jańa týyndylary bar.