22 qarasha kúni Astanadaǵy «Qazaqstan Respýblıkasynyń Tuńǵysh Prezıdenti – Elbasynyń kitaphanasynda» Qazaqstan jastar Kongresi «Úzdik volonter-2016» baıqaýyn ótkizedi.
Respýblıkalyq jáne aımaqtyq uıymdardyń eriktileri men ókilderinen qurylǵan qazylar alqasy elimizdiń túkpir-túkpirinen eriktilerdiń jibergen ótinimderin iriktep, «Úzdik volonter-2016» atyna saı úzdik nomınanttardy tańdady. О́tinimder 1 aı boıy onlaın rejıminde qabyldanǵan. Aldyńǵy qatarly jastar jáne kommersııalyq emes uıymdardyń, qorlardyń basshylary men buqaralyq aqparat quraldarynyń ókilderinen turatyn baıqaý komıssııasy 2 apta ishinde birneshe nomınasııa boıynsha jeńimpazdardy anyqtady. Olar:«Úzdik volonter», «Úzdik volonterlik uıym», Qazaqstan Rekspýblıkasynyń 25-jyldyǵyna oraı, VI-shy qysqy Ýnıversıadany uıymdastyrýǵa qatysqan volonterler jáne volonterlik uıymdar arasyndaǵy «Úzdik volonter». Jeńimpazdar baǵaly syılyqtarmen marapattalady. Jalpy júlde qory – 360 myń teńge.
Baıqaýdyń basty maqsaty – 2016 jyl ishindegi eriktilerdi, eriktiler uıymdaryn, olardyń júzege asyrǵan jobalaryn iriktep, úzdikterine alǵys aıtý, marapattaý.
«Jyl ótken saıyn eriktiler qozǵalysy jandanyp, olardyń qyzmetteri qoǵamda keńinen taralýda. Árıne, eriktiler ózderine alǵys aıtýlaryńyzdy qajet dep tappaıdy, alaıda, biz osyndaı baıqaýlardyń kómegimen olarǵa tek rızashylyǵymyzdy bildirip qana qoımaı, mundaı jandardyń bolashaqta da óz qaıyrymdylyq isterin odan ári jalǵastyrýlaryna yntalandyrǵymyz keledi», – deıdi «Qazaqstan jastar Kongresi» zańdy tulǵalar birlestiginiń atqarýshy dırektory Aıdyn Sábıtov.
Qazirgi tańda Qazaqstannyń barlyq aımaǵynda «EKSPO-2017» halyqaralyq kórmesi men VI-shy Ýnıversıadaǵa eriktilerdi daıyndaý jumystar belsendi júrgizilýde.
Láıla EDILQYZY,
"Egemen Qazaqstan".