Qostanaı dıqandary Táýelsizdik alǵan jyldan beri 106 mıllıon tonna astyq óndirdi. Onyń 40 mıllıon tonnadan astamy eksporttaldy. Bul týraly Qostanaı oblysynda aýylsharýashylyǵy kúnine oraı ótkizilgen jıynda oblys ákiminiń birinshi orynbasary Ǵaýez Nurmuhambetov aıtty. Oblysta qambaǵa 5,6 mıllıon tonna astyq quıyldy, ortasha gektar aınalymy 13,3 sentnerden keldi. Respýblıka oıynsha óndirilgen astyqtyń tórtten biri Qostanaı oblysynyń úlesine tıedi.
Ústimizdegi jyly oblysta óndirilgen barlyq astyqtyń bir mıllıon tonnasyn tek Qarasý aýdany dıqandary jınady. Sonymen qatar Fedorov aýdany alqaptarynda bıdaı gektaryna 16,3 sentnerden kelse, Qarabalyq, Sarykól, Uzynkól aýdandarynda bul kórsetkish 15 sentnerden asyp jyǵyldy. Jeke sharýashylyqtar da rekordtyq kórsetkishterge jetti. Mysaly, Meńdiǵara aýdanyndaǵy Olga Iаkımova jetekshilik etetin «Iаkımov» sharýashylyǵynda gektar aınalymy 26 sentnerden kelse, Sarykól aýdanyndaǵy Baımyrza Sataevtyń «Sataev» sharýa qojalyǵy gektarynan 25 sentnerden altyn astyq jınady.
Aýylsharýashylyǵy qyzmetkerlerin oblys ákimi Arhımed Muhambetov merekelerimen quttyqtap, eńbek erleri men adagerlerdi «Eńbek ardageri», «Qurmetti ardager», «Qostanaı oblysyna 80 jyl» medalderimen jáne «Aýyl sharýashylyǵy salasynyń úzdigi» tós belgisimen marapattady.
Názıra Járimbetova,
"Egemen Qazaqstan".