Ońtústik Qazaqstan oblysynyń ákimdiginde VI shaqyrylymdaǵy oblystyq máslıhattyń kezekten tys 7 sessııasy ótti, dep habarlady QazAqparat.
Sessııa jumysyna oblys ákimi Janseıit Túımebaev, oblystyq máslıhat depýttary men oblys ákiminiń orynbasarlary, basqarma basshylary jáne aýdan, qala ákimderi, buqaralyq aqparat quraldarynyń ókilderi qatysty. Kún tártibinde 7 másele qaraldy. Atap aıtqanda, altynshy shaqyrylymdaǵy Ońtústik Qazaqstan oblystyq máslıhatynyń hatshysyn saılaý, «2016-2018 jyldarǵa arnalǵan oblystyq bıýdjet týraly» Ońtústik Qazaqstan oblystyq máslıhatynyń sheshimine ózgerister men tolyqtyrýlar engizý, «Ońtústik Qazaqstan oblysyndaǵy adamdardy zańsyz áketýge, ákelýge jáne satýǵa qarsy kúres máseleleri jónindegi vedomstvoaralyq komıssııanyń derbes quramyn bekitý týraly» Ońtústik Qazaqstan oblystyq máslıhatynyń sheshimine ózgerister engizý týraly jáne t.b. ózge de mańyzdy máseleler.
Sonymen sessııa otyrysynda oblystyq máslıhat hatshysyna Qaırat Rahymuly Balabıevtiń kandıdatýrasy usynylyp, depýtattar ony biraýyzdan qoldady. Sondaı-aq, kún tártibindegi ózge de máselelerge halyq qalaýlylary biraýyzdan daýys berý arqyly sheshim qabyldap, olardyń oryndalýyn maquldady.
Qaırat Balabıev 1965 jyly týǵan. Uzaq jyldar prokýratýra salasynda qyzmet etken. Ár jyldary Shymkent qalasynyń prokýrory, Ońtústik Qazaqstan, Jambyl oblystary prokýrorynyń orynbasary bolǵan.
Sessııanyń kún tártibinde sóz alǵan aımaq basshysy J.Túımebaev jańa hatshyny qyzmetimen quttyqtap, jumysyna tabys tiledi. Sonymen birge, osy ýaqytqa deıin oblystyq máslıhat hatshysynyń mindetin atqaryp kelgen Ábilqasym Dosbolovqa alǵysyn bildirdi.