Táýelsizdik tańy – ejelgi batyrlarymyzdyń, Alashymyzdyń arystarynyń jaýkeshti zamandarda, qantógis shaıqastarda qasyqtaı qanyn qıyp, san ǵasyrlar boıy túrli jaýmen arpalysta saqtap qalǵan keń dalasynda búgingi kúnde ómir súrip otyrǵan urpaqtyń mańdaıyna bitken baqyty.
Táýelsiz Qazaqstannyń álem kartasynda shekarasy aıqyndalyp, kók baıraǵy jelbirep, árdaıym bitimgerlikke bastaıtyn beıbit úniniń jarqyn shyǵýyna búginde shırek ǵasyr ýaqyt tolyp otyr. Elimiz osy kezeń barysynda orasan qıyn joldardan ótti. Ekonomıkasy men saıasatyn jańadan qurýǵa, bilimi men mádenıetin jańǵyrtýǵa, jalpy ómirin qaıta qurýyna týra keldi. Bul beıbit ómirde bolǵan surapyl shaıqastardaı edi.
Táýelsizdik tańynyń atýyn da zor ról atqarǵan elimizdiń tarıhı eren tulǵasy – Elbasymyzdyń osy jyldar boıy ustanǵan syndarly saıasatynyń, halqymyzdyń mańdaı terin tógip etken qajymas eńbeginiń arqasynda elimiz syn-ótkelderden súrinbeı ótip, qazir órkenıet kóshimen ilese damyp, álemdegi aldyńǵy qatardaǵy 30 eldiń qataryna umtylýy – ótken shırek ǵasyrdaǵy tamasha jetistigimiz.
Qazaq eli uly dalamyzdy mekendegen kóshpendi halyqtyń laıyqty urpaǵy bolyp otyr. Elbasymyz teńdessiz «Máńgilik El» ıdeıasyn tujyrymdaýmen qatar elimizdi «Uly Dala eli» dep ataýdy usyndy. Bıyl táýelsizdigimizge shırek ǵasyr tolýy qarsańynda Elbasy óziniń «Uly Dala ulaǵattary» atty eńbegin jaryqqa shyǵardy. Bul aldymen, jas urpaq úshin jazylǵan, sebebi, ár jolynyń máni men tárbıesiniń mańyzy zor. Tarıh qoınaýyna shekken shynaıy sapar sekildi, ótkendi zerdelep, búginniń ózekti suraqtaryna jaýap qatýmen qatar túrli tyǵyryqtan shyǵatyn naqty amal-tásilder usynatyn, sonymen qatar, bolashaqqa arnalǵan batyl armandarǵa da qol sozdyratyn tereń oıdyń jemisi.
Týyndyda táýelsizdik taǵdyry, el men jer, til men din, qandastarymyzdyń elge oralýy, saıasat tuǵyry sekildi kúrdeli, zamanaýı ózekti taqyryptar qozǵalady. «Otbasy – Otan tiregi» dep Elbasy otbasy máselesin erekshe atap, arnaıy bólim arnaǵany úshin alǵys aıtamyn. Eńbektiń, ásirese, el bolashaǵy – jastardyń sanasyn bıiktetip, óresin keńeıtip, jan-jaqty bilimmen sýsyndatý jolynda aqylshy qural bolatyndyǵy sózsiz.