Elbasynyń «Uly Dala ulaǵattary» taqyrybymen gazette jarııalanǵan jańa týyndysyn tolyqtaı oqyp shyqtym. Úlken áserge bólendim.
«Mine, Táýelsizdigimizge shırek ǵasyr tolǵan torqaly kezeńge keldik. Bul az ýaqyt pa, álde kóp pe? Neden bastadyq, qaı jerge jettik? Osynyń bárin tyńǵylyqty tarazylap, baǵasyn berer shaq keldi. Bolǵanǵa baıypty baǵa berý – baıyrǵy ádetimiz», – dep bastaıdy Memleket basshysy týyndysynyń alǵysózin.
Shúkir, búginge deıin kórmegen qıyndyǵymyz, aýyrtpalyǵymyz, qııanatymyz az bolmasa da, jańa ǵasyrdyń tabaldyryǵyn attar tusta mańdaıymyzǵa azattyqtyń aq tańyn kórýge jazypty. Mine, sodan beri shırek ǵasyrǵa jýyq ýaqyt ótip, osy bir shýaqty shaqta muqym jurttyń mereıin ósirgen irgeli, izgi, ilkimdi ister jalǵasyn taýyp, barlyǵymyz da tolaıym tabystyń jarqyn jobalaryn tamashalap júrgenimiz zor qýanysh.
«…Osynaý shırek ǵasyr ǵana táýelsizdik jyldarynda nebir oqıǵalardy bastan keshtik. Qıly kezeńder men beıtanys bógetterdi basyp ótip, óz jolymyzdy tabýǵa umtyldyq. Bul turǵydan kelgende, halqymyzdyń birligi men yntymaǵy aldaǵy kúnge alyp baratyn týymyz, uranymyz ári quralymyz boldy. Biz jalpyulttyq maqsatqa judyryqtaı jumylyp, birigip, birlesip umtyldyq. Jańa dáýirdiń bolmys-bitimin ulttyq salt-dástúrlerimizdiń aıasynda zamanaýı syn-tegeýrinderge beıimdedik, memleket bolyp qalyptasýdyń ózindik órnegin taýyp, mektebin qalyptastyrdyq. Qazaqta «Men bitirdim degenshe, el bitirdi deseıshi» degen danalyq sóz bar. Osy sózdiń mán-maǵynasyn jańa turpatty memleket ornyqtyrý isinde jalpyulttyq tutastyq, halyqtyq qoldaý, qoǵamdyq turaqtylyq nátıjesinde júzege asyrdyq», – dep tolǵanady Elbasy.
Jaratýshy ıemizdiń bizge jasaǵan jaqsylyǵy – eshkimge kiriptar bolmaıtyn, alys-jaqynmen erkin qarym-qatynas jasaı alatyn egemen, azat, bostandyq baıraǵyn bekem ustaǵan, berekeli tirshilik qazanyn qaınatqan, keleshegi jarqyn, kemel isterge batyl qadam jasaı biletin irgeli memleketke aınalyp kelemiz. Tórtkúl dúnıe bizdiń izgi isterimizge oń baǵasyn berip, keıbir óreli ózgeristerdi ónege etip, ózderiniń tynys-tirshiligine keńinen paıdalanyp jatqanyn da bilemiz. Oılanyp kórseńiz, osynyń barlyǵy oraıly isterdiń jemisi ekeni daýsyz. Qaı kezde de bizdiń halqymyz «birlik túbi – tirlik» ekenin bildi. Aýyzbirshilik, uıymshyldyq, tatýlyq, dostyq sondaı jańashyl bastamalarǵa jol ashyp, tuǵyrymyzdyń bıik, maqsatymyzdyń aıqyn, keleshegimizdiń jarqyn bolýyna óz septigin tıgizedi.
Qysqasha aıtqanda, biz tereń oıǵa jeteleıtin, tolǵamy keń, talǵamy bıik tushymdy dúnıeni oqyp, odan kóptegen oılardy túsinip, ózimizdiń táýelsiz elimizdiń týyn kókte jelbirete otyryp, alda talaı asqar asýlardy, bıik belesterdi baǵyndyra beretinimizge kózimizdi aıqyn jetkize aldyq.