Qazaqstan Respýblıkasynyń Tuńǵysh Prezıdenti – Elbasy qorynyń stýdenttik shákirtaqysy sarapqa túsken baıqaý komıssııasynyń sheshimimen Merýert Shýkýeva, Pavel Graf, Álııa Laýbaı, Iýlııa Tarasova, Altyn Amangeldınova jáne Ádilhan Qasymov jeńimpaz atandy.
Pavlodar memlekettik ýnıversıtetiniń stýdentteri ózderiniń joǵary akademııalyq kórsetkishterimen qosa ýnıversıtettiń qoǵamdyq jáne ǵylymı-zertteý jumystaryndaǵy jetistikterin, sondaı-aq, stýdentter men oqytýshylar arasyndaǵy bedelderin dodanyń eki kezeńinen turatyn irikteýinen oza shaýyp bekitti.
Bolashaq tilshi Merýert Shýkýeva oqýy men mamandyǵy boıynsha jumysyn tamasha ushtastyryp keledi. «Oryndaýshylyq óner» kafedrasynyń stýdenti Pavel Graf fortepıano boıynsha halyqaralyq mýzykalyq baıqaýlardyń birneshe dúrkin laýreaty atanǵan. Al gýmanıtarlyq-pedagogıkalyq fakýltettiń stýdenti Altyn Amangeldınova – EKSPO-2017 halyqarlyq kórmesine daıyndyq ortalyǵynyń eriktisi. Búgingi kúni Altyn Erazmýs+ baǵdarlamasy boıynsha Chehııada bilim alyp júr.
Volonterlik jumysty ózine serik etken taǵy bir belsendi jas – sáýlet-qurylys fakýltetiniń stýdenti Álııa Laýbaı da jeńimpazdar qatarynan kórindi. Álııa bul jumyspen 11 jasynan beri aınalysyp, kóptegen áleýmettik is-sharalarǵa qatysýdy ómiriniń máni sanaıdy. «Shákirtaqy ıegerleri qatarynda bolǵanym – men úshin zor mártebe. Birinshi kezekte, 30 jeńimpazdyń ishinde S.Toraıǵyrov atyndaǵy PMÝ-iniń alty birdeı stýdenti atalǵany – ýnıversıtetimiz úshin úlken jeńis. Osyndaı qorlar jastardyń belsendi bolýyna, jeke tulǵa retinde qalyptasýyna, maqsat qoıyp, ony ıgerýine jol salyp beredi», deıdi Álııa.
Raýan QAIDAR,
«Egemen Qazaqstan»