Alǵashqy kún Ata Zańǵa arnaldy

Ońtústik Qazaqstan oblysynda Qazaqstan Respýblıkasy Táýelsizdi­gi­niń 25 jyldyǵyna arnalǵan «Uly Dala eli – táýelsizdik­tiń 25 negizi» at­ty 25 juldyzdy kún aksııasynyń alǵashqy kúni Konstıtýsııa kúnine arnaldy. Juldyzdy kún «Qazaqstan Res­pýb­lı­kasynyń Konstıtýsııasy» dep atalyp, Shymkent qalasyndaǵy «Kórme» orta­lyǵynda «Táýelsizdik jetistikteri» atty tanystyrylymdyq kórme kesheniniń ashylýymen bastaldy. Sharaǵa qatysqan oblys ákimi Janseıit Túımebaev barsha ońtús­tik­qazaqstandyqtardy Táýelsizdik toıymen quttyqtap, elimizdiń jetken jetistikteri men Ata Zańnyń mán-maǵynasyna toqtaldy. – Qazaqstan Respýblıkasy 25 jyldyń ishinde Elbasy Nursultan Ábishuly Nazarbaevtyń basshylyǵymen tórtkúl dúnıege tanyldy, álem moıyndaǵan egemen el boldy. Táýelsiz eldiń eń basty tuǵyry, ol – qoǵamnyń, sol memlekettegi jergilikti ulttyń rýhy, jigeri, qoǵamdyq sanasy. Jańa álemdegi jańa Qazaqstannyń búgingi qudiretti kúshi el birliginde, ult­tar tatýlyǵynda jatyr. Qazaqstan úshin HHI ǵasyr tarıhynyń paraǵy parasat pen paıymǵa toly. Al «Ulystyń uıyt­qysy – Ońtústik» atanǵan óńir halqy da Táýelsizdiktiń tartýlaryn is júzinde sezinýde. Táýelsizdik jyldarynda óńir eko­no­mıkasyna 3 trln 300 mlrd teńgeden astam ınvestısııa tartylyp, 347 densaýlyq saqtaý nysany, 491 mektep, 1491 balabaqsha iske qosyldy. Jalpy, Táýelsizdiktiń arqasynda qol jetken iri jeńisterge dálel bolatyn mysaldar óte kóp. Qazaqstannyń qanshalyqty óskenin salystyrmaly túrde aıtsaq, 2001 jyly búkil memleketimizdiń bıýdjeti 508 mlrd teńge bolsa, búginde tek Ońtústik Qazaqstan oblysynyń bıýd­jeti 550 mlrd teńgege jetip otyr, – dedi Janseıit Qanseıituly. «Táýelsizdik jetistikteri» atty tanystyrylymdyq kórme elimizdiń shırek ǵasyrda qol jetkizgen kórsetkishteri – «Qazaqstan-2050» Strategııasy, Astananyń damýy, Indýstrııalyq-ınnovasııalyq damý baǵdarlamasy, «Máńgilik El» jalpyulttyq ıdeıasy, Álemdik jáne dástúrli dinder kóshbasshylarynyń sezderi syndy 14 taqyryptyq bólimnen tursa, qalǵan 12 bólim Ońtústik Qazaqstannyń áleýmettik-ekonomıkalyq kórsetkishteri men shaǵyn jáne orta bıznestiń damýy, turǵyn úı qurylysy, aýyl sharýashylyǵy men bilim, mádenıet, sport jáne týrızmniń damýyna arnaldy. Sonymen birge, shara aıasynda egiz týǵan nárestelerdiń ata-analaryna týý týraly kýálikter berilip, qoǵam ómirine etene aralasyp, belsendi kózge túsip júrgen 16 jasqa tolǵan azamattarǵa jeke kýálikter tapsyryldy. Al mereke qarsańynda shańyraq kóterip, otbasyn qurǵan jas jubaılarǵa neke kýáligi tabystaldy. «Táýelsizdik jetistikteri» tanysty­ry­lymdyq kórmesinde oblys ákimi Janseıit Túımebaev oblystyq ardagerler keńesiniń tóraǵasy Jeńisbek Máýlenqulov bastaǵan ardagerlerge Qazaqstannyń Táýelsizdik jyldarynda jetken jetistikteri týraly áńgimelep, «100 naqty qadam» Ult jos­pary boıynsha júıeli jumys jasalyp jatqandyǵyn aıtty. «Elge el qosylsa – qut» deıdi halqy­myz. Kúngeıge kórshi memleketterden kóship kelip jatqan otandastarymyz kóp. Mysaly, 1991-1992 oqý jylynda mektepterde 429 myń 081oqýshy oqysa, 2016-2017 oqý jylynda oqýshylar sany 611 myń 318-ge jetken. Iаǵnı, tabıǵı ósim de kóz qýan­tady. Táýelsizdik jyldarynan bergi tek bilim salasynda salynǵan nysan­dar­dyń 5700 ekendigin eskersek, ár sala bo­ıyn­sha osyndaı jaqsylyqtar aıtýǵa bolady. Qazaqstan Respýblıkasynyń Kons­tıtý­sııasyna arnalǵan is-sharalar oblystyń ózge de óńirlerinde jalǵasyn tapty. Baqtııar TAIJAN, «Egemen Qazaqstan» Ońtústik Qazaqstan oblysy