Aqtóbe oblysynda el Táýelsizdiginiń 25 jyldyǵyn keńinen merekeleý aıasynda aýqymdy sharalar ótkizilýde.
Osy sharalarda Qazaqstannyń egemendik alǵan jyldardaǵy jetistikteri molynan qamtylýda. «NurOtan» partııasy oblystyq fılıalynda osyndaı mańyzdy tarıhı oqıǵalarǵa, el ómirindegi eleýli sátterge arnalǵan «Uly Dala eli -Táýelsizdiktiń 25 negizi» atty 25 taqyryptyq kúnniń saltanatty ashylýy ótti. Atalmysh sharaǵa soǵys jáne eńbek ardagerleri, qalanyń qurmetti azamattary, memlekettik mekemelerdiń, qoǵamdyq uıymdardyń, kásiporyndar men kásipkerlik, shyǵarmashylyq qoǵamdastyq ókilderi, sportshylar men jastar qatysty. -Bıyl Qazaqstan Respýblıkasynyń 25 jyldyǵyn atap ótpekpiz. Osy kezeńde biz kóp nársege qol jetkizdik. Eń bastysy, kópultty Qazaqstan halqy beıbit ómir keshýde. Ártúrli ekonomıkalyq, saıası daǵdarystarǵa qaramastan halqymyzdyń dáýlettiligi artyp, turmysy jaqsaryp keledi. Osynyń barlyǵy Memleket Basshysy Nursultan Nazarbaevtyń júrgizip otyrǵan sarabdal saıasatynyń arqasy deý oryndy bolmaq. Osy sátten bastap óńirdiń barlyq eldi mekenderin qamtıtyn 25 juldyzdy kún bastaý aldy. Jyl basynan beri Táýelsizdiktiń 25 jyldyǵy aıasynda 4 myńnan astam shara uıymdastyryldy. Bizdiń basty mindetimiz – ár adamǵa, sonyń ishinde kómekkke muqtaj jandarǵa memlekettiń qoldaýyn sezdirý. Sol kezde ǵana biz bir otbasy, bir memleket ekenimizdi kórsetemiz,-deı kelip Berdibek Saparbaev jıynǵa qatysýshylardy Táýelsizdik mereıtoıymen quttyqtady.
Budan keıin zalǵa M.Bókenbaev atyndaǵy Aqtóbe zań ınstıtýtynyń kýrsanttary memlekettik Eltańba men Týdy ákeldi. Jıynǵa qatysýshylar oryndarynan tik turyp, estradalyq-úrlemeli aspaptar orkestriniń súıemeldeýimen elimizdiń Ánuranyn oryndady. Merekelik baǵdarlama «25 juldyzdy kún» kompozısııasymen bastalyp, «Ulttyq memlekettik rámizder», «Iаdrolyq qarýsyz álem», «Ulttyq valıýta», «Memlekettik til», «Otbasylyq qundylyqtar», «Ǵylym men jańa tehnologııalar», «Sport jetistikteri» jáne basqa taqyryptyq qoıylymdarmen jalǵasty. Baǵdarlamanyń «Otbasylyq qundylyqtar» taqyryptyq bóliginde «Mereıli otbasy» ulttyq baıqaýynyń jeńimpazdary - Nusqabaevtar áýleti sahna tórine kóterildi. Jubaıymen 72 jyl otasyp, 10 bala ósirip, tárbıelegen, olardan 31 nemere men 22 shóbere súıip otyrǵan Abdolla Nusqabaev aqsaqal jınalǵandarǵa óziniń izgi tilegin jetkizip, aq batasyn arnady. Balalar úıinen 11 bala asyrap alǵan О́mirhan jáne Amangúl Jetesovter balalarymen birge óner kórsetti. Jalpy juldyzdy kúnder ótetin 21 qarasha men 15 jeltoqsan arasynda tek Aqtóbe qalasynda ǵana 200-den asa aýqymdy mádenı-kópshilik, áleýmettik-mańyzdy sharalar uıymdastyrylady, 37 óndiristik jáne áleýmettik nysandar paıdalanýǵa beriledi dep kútilýde. Mereıtoılyq saltanatqa arnalǵan sharalar barlyq aýdandarda da ótkiziledi. Shara sońynda «NurOtan» partııasy oblystyq fılıaly ǵımaraty aldynda jastar men balalar kók aspanǵa 25 myń shardy áýelete ushyrdy.
Satybaldy SÁÝIRBAI,
«Egemen Qazaqstan».
Sýretterdi túsirgen Haıreden Raýshanov Aqtóbe.