Londonda QR Investısııalar jáne damý vıse-mınıstri jáne «Qazgeologııa» AQ basqarma tóraǵasy Ǵalym Nurjanov álemdegi iri shveısarııalyq Glencore kompanııasynyń aksıoneri, sondaı-aq «Kazzinc Holdings» JShS dırektorlar keńesiniń tóraǵasy Nıkola Popovıchpen kezdesti. «Qazgeologııa» AQ baspasóz qyzmetiniń habarlaýynsha, taraptar birlesken jobalardy iske asyrý boıynsha josparlardy talqylap, ortaq mámilege keldi.
Atap aıtqanda Glencore «Qazsınk» JShS arqyly 5 boljaldy ýchaskede geologııalyq barlaý júrgizýdi qarjylandyrýǵa ázir. Olar Qazaqstandaǵy óndiristik kompanııalary bar shaǵyn qalalarǵa jaqyn ornalasqan. 2017 jyldan bastap kompanııa atalǵan ýchaskelerde birlesken geologııalyq barlaýdy bastaýǵa ázir. Bastapqy kezeńde ınvestısııa kólemi keminde 10 mln AQSh dollary bolady.
«Qazgeologııa» AQ basshylyǵy Rio Tinto-nyń Afrıka-Eýrazııa óńirindegi geologııalyq barlaý operasııalary dırektory Ken Tentonmen kezdesti. Kezdesýde Qaraǵandy oblysyndaǵy júzege asyrylyp jatqan 2 joba boıynsha ekijaqty yntymaqtastyqtyń ózekti máseleleri talqylandy. Sondaı-aq aldaǵy jyly qazaqstandyq kadrlardy oqytý jáne osy salaǵa ınnovasııalyq tehnologııalardy transfertteý jaıy da qarastyryldy.