Almatyda jergilikti bıýdjetti únemdeýdiń arqasynda áleýmettik jaǵdaıy tómen, sondaı-aq bıýdjettik jáne áleýmettik salada qyzmet etetinderge syıaqy beriledi, - dep habarlaıdy Tengrinews.kz. Bul týraly Almaty qalasynyń ákimi Baýyrjan Baıbek "Nur Otan" partııasynyń qalalyq fılıalymen ótken konferensııa barysynda aıtty.
Onyń aıtýynsha, qalalyq bıýdjetti ońtaılandyrýdyń nátıjesinde dárigerlerge, muǵalimderge, tárbıeshilerge, áleýmettik jumysshylar men áleýmettik jaǵdaıy tómen turǵyndarǵa syıaqy berý múmkindigi týdy.
2016 jyly jergilikti bıýdjetten 123 mıllıard teńge únemdelgen: jol aınalymdaryn ońtaılandyrýǵa, qurylys nysandary men Ýnıversıadaǵa bólingen qarajattan 60 mıllıard teńge, áleýmettik nysandarǵa bólingen qarajattan 56,5 mıllıard teńge únemdelse, memlekettik satyp-alýlar kezinde 6,5 mıllıard teńge únemdelgen.
Osyny eskere otyryp, Memleket basshysynyń tikeleı tapsyrysymen Qazaqstan Respýblıkasy Táýelsizdiginiń 25 jyldyǵyna oraı jergilikti bıýdjettegi qarajattan áleýmettik jáne bıýdjettik salada jumys isteıtin almatylyqtarǵa bir alatyn aılyǵynyń kóleminde syıaqy berilse, áleýmettik jaǵdaıy tómen turǵyndardyń árqaısysyna 50 myń teńge kóleminde syıqaqy beriledi", - dedi Baıbek.
Jalpy, syıaqy alatyn almatylyqtardyń sany shamamen 114,3 myń eken. Al bólinetin qarajat 6,2 mıllıard teńge bolyp tur.
"Memleket basshysy men Partııa kóshbasshysynyń mereke qarsańynda kórsetip otyrǵan kómegi olarǵa birinshi qajettiliktegi taýarlardy satyp alýyna, azyq-túlik ónimderin alyp, kommýnaldyq qyzmetterin tólep, nesıelerin óteýge kómektesedi dep senemin. Iаǵnı, eń qajetti dúnıelerine jarata alady dep senemin", - dedi Baýyrjan Baıbek.
Sonymen qatar, qala basshysy Almatydaǵy ekonomıkalyq jaǵdaıdyń jaqsy nátıje kórsetip otyrǵanyn aıtty. Onyń aıtýynsha, bıyl salyq kórsetkishi aıtarlyqtaı kóterilip, 35,3 mıllıard teńgege (114 paıyzǵa) jetken.