«Bıatlonǵa birjola bet burdym»

– deıdi jasóspirimder arasyndaǵy álem chempıony Arına Pantova Qarashanyń 25-i kúni Norvegııanyń Beıtostolen qalasynda IBU Kýbogynyń birinshi kezeńi ótýimen bıatlonnyń jańa maýsymy ashylǵaly tur. Atalmysh dodada el namysyn qorǵaıtyndar qatarynda 17 jastan endi asqan pavlodarlyq Arına Pantova da bar. Bıylǵy jyl basynda jasóspirimder álem chempıonatynda altyn medal alyp, Olımpııa oıyndarynda qola júldeger atanǵan ol osy joly eresekter arasyndaǵy jarysqa alǵash ret qatyspaqshy. Biz bolashaǵynan kóp úmit kúttiretin bıatlonshy qyzben áńgimelesken edik. – Eresekter tobyndaǵy birinshi saıysqa daıyndyǵyńyz qalaı? – Daıyndyq áli bitken joq, ol jarys bastalǵanǵa deıin sozylady. Sońǵy kezeńde júrmiz. Jeke jattyqtyrýshylarym (olar – ózimniń ata-anam) men qurama bapkerleri aqyldaryn aıtyp baǵýda. Jarys barysynda qobaljysań, bar eńbegiń zaıa ketedi. Sondyqtan «synyp» ketpeýimiz kerek. Úlken­dermen halyqaralyq arenada tuńǵysh ret synǵa túsetindikten, eptep úreı men qobaljý bar. Onyń bári jarys­qa shyqqan sátte-aq umytylyp ketedi dep oılaımyn. – Eresekter men jastar arasyndaǵy jarystardy qatar alyp júrý qıyn bolmaı ma? – Qaı jarysqa qatysatynymyzdy qurama jattyq­tyrýshylarynyń shtaby sheshedi. Bizdiń maqsat – barynsha sátti óner kórsetip, artylǵan senimdi aqtaý. О́tken jyly da ózimnen birneshe jas úlken qarsylastarmen saıysqa túskenmin. Men úshin báribir. О́zimniń daıyndyǵym durys bolsa – jetedi. Bir jylǵa eseıdim, qatelikterdi jibermeý jolynda biraz jumys jasadym. Buryn atý alańyna kelgende demdi durys almaı, ýaqyt ótkizip alýshy edim, ol olqylyq joıyldy. – Siz bıatlonmen kásibı túrde aınalysatyn otbasydan shyqtyńyz. Ákeńiz ben anańyz – osy salada jattyqtyrýshy bolsa, aǵańyz Anton ulttyq qurama sapynda táýir óner kórsetip júr. Dese de, bıatlon men Arınanyń egiz uǵym ekenin qashan sezdińiz? – Bala kúnimnen bul sporttan alys ketpeıtinimdi bildim, ketýge múmkindik te joq edi. Sebebi, aǵam men áke-sheshemniń jatsa-tursa oılaıtyny bıatlon bolatyn. Basynda jaı hobbı túrinde aınalysatynmyn, tek byltyr jastar arasyndaǵy Rýmynııada ótken álem chempıonatynda jeńiske jetken soń ǵana onymen kásibı turǵyda aınalysýǵa sheshim qabyldadym. – Jeńistiń dámin tatqan soń qyzyǵýshylyq arta túsken ǵoı? – Iá. Álemdik deńgeıdegi jarysta bıik tuǵyrda turyp, sen úshin elińniń týy bıikke kóterilip ánurany shyrqalǵanda, erekshe sezimde bolady ekensiń. Saǵan qoldaý bildirip, tileýińdi tilep otyrǵan jankúıerler men jattyqtyrýshylardyń eńbegi aqtalǵany kózge eriksiz jas ákeledi. – Qarsylastaryńyz ózińizden 2 jas úlken bolsa da, márege birinshi jetip, álem chempıony atandyńyz. Sol kezde qandaı kúıde boldyńyz? – Shynymdy aıtsam, qarsylastarymnyń jasyna mán bermedim. Bar oıym atý alańyna kelgende kóp qatelespesem dep oıladym. Márege birinshi bolyp jetkende, ata-anamnyń úmitin aqtaǵanym úshin ózimdi baqytty sezindim. Sol kezde ózime keleshekte eresekter arasynda álem chempıony atanyp, Olımpıadada medal alamyn dep sóz berdim. – О́tken jylǵy maýsym siz úshin sátti boldy. Bıylǵy josparlar qandaı? – Álem chempıony atanǵan soń ózime júktelgen júktiń aýyr ekendigin sezindim. Jankúıerlerdiń menen joǵary nátıjeler kútetini anyq. Basty maqsatym – psıhologııalyq turǵydan óz-ózimdi daıyndaý. Moraldyq turǵydan da­ıyn bolsam, basqasy ońaı bolatynyn sezemin. Sondyqtan, byltyrǵy maýsymda kórsetken bıik mejeni bıyl asyra oryndaýǵa tyrysamyn. – Bıatlon bir ǵana jarystan turmaıdy. Sprınt, iz kezý sekildi qysqa-uzyn qashyqtyqqa júgirý kezeńderi bar. О́zińiz qaısysyn unatasyz? – Naqty aıtý qıyn. Uzaq qashyqtyqqa júgirýdi unatamyn. Qýalap jetýge múmkindik kóp. Alaıda, sprınt te óte unaıdy, óıtkeni, onda eki atý kezeńi ǵana bar. – Bıatlondaǵy pirińiz kim? – Meniń basty úlgi tutar adamym – aǵam. Ol – men úshin árkez nómiri birinshi. Onyń aıtqan aqyly, aǵa ǵana emes, sport mamany retindegi keńesteri men úshin mańyzdy. – Bıyl mektep bitiretin jylyńyz. Sport pen oqýdy qatar alyp júrý qıyn emes pe? – Joq. Ustazdaryma myń alǵys. Barlyǵy túsinistikpen qarap, qataldyq kórsete bermeıdi. Oblystyń, Qazaqstannyń namysyn qorǵap júrgenim – olar úshin maqtanysh, sondyqtan baǵalarym jaman emes. – Bos ýaqytyńyzda nemen aınalysasyz? – Bos ýaqyt kóp bola bermeıdi, qolym qalt etkende toqyma toqyp, sýret salǵandy unatamyn. Kitap oqımyn. Ár adam ózin jan-jaqty damytý kerek. Sport pen aqyl qatar damysa, úlken baılyq sol dep oılaımyn. Áńgimelesken Aıdos RYMQULOV, L.N.Gýmılev atyndaǵy Eýrazııa ulttyq ýnıversıtetiniń stýdenti ASTANA