Táýelsizdik týraly tolǵaý

Endi az ýaqyttan keıin jyldyń eń úlken merekesi – Qazaq eliniń Táýelsizdik kúnin toılaımyz. Ulyq meıramǵa Uly Dalanyń daıyndyǵy erekshe. Ásirese, aqparat salasynyń ázirlegen tartýlary jurtshylyqqa osynaý kúnniń mańyzyn aıqyndaı túskendeı. Tarıh qoınaýynda qanshama jyldar, jetken jetistikter men baǵyndyrǵan belester jatyr. Táýelsiz eldiń 25 jylda júrip ótken joly keıbireýlerge úlgi bolsa, keıbireýler úshin qyzyǵa da, qyzǵana da qaraıtyn dara jolǵa aınaldy. Shırek ǵasyrda Qazaqstan derbes memleket retinde aıaǵyn nyq basyp, jan-jaǵyndaǵy alpaýyt elderdi ózine qarata bildi. Ekonomıka, saıasat, mádenıet pen óner, ǵylym men bilim, sport salalaryndaǵy tabystarymyzdy maqtanyshpen aıtar ýaqyt keldi. Sol sebepti «Habar» arnasy Táýelsizdik mere­kesine tartý retinde «Paı-paı, 25» jobasyn usynǵan bolatyn. Qazan aıynyń basynda efırge shyqqan baǵdarlamada jurt­shylyq bile bermeıtin má­limetter, qyzyqty oqıǵalar men taǵylymdy áńgimeler aıtyldy. Sondaı-aq, áýezdi án men kúmbirlegen kúı de habardyń ajaryn asha túskendeı. «Joba bary­synda kóp nárse aıtyldy, áli aıtylady da. О́ıtkeni, Táýelsizdik jyldaryndaǵy jetis­tikterdi endi ǵana jıyrma beske kelgen nemese mektep jasyndaǵy jetkinshekterge aıtý, sonymen qatar, eresekterdiń esine salý – baǵdarlamanyń alǵa qoıǵan mindeti. Táýelsiz eldiń ulany bolyp dúnıege kelgen jas urpaqqa bul sonshalyqty mańyzdy ta­qyryp bolmaýy múmkin. О́ıt­keni, olardyń ómiri azat elde bas­taldy, dúnıege shyr etip kel­gennen bastap Qazaqstannyń tólqujatyn alyp, tól teńgemizdi ustady. Degenmen, olar bos­tandyqtyń qalaı kelgenin, osy bıikke jetkenge deıingi aýyr joldy bilýi, qadirine jetýi kerek. Al egemendiktiń tarıhı mańyzyn uǵyndyrý bizdiń, aqparat salasy qyzmetkerleriniń boryshy», – deıdi «Paı-paı, 25» jobasynyń sarapshysy Qymbat Dosjan. Jobanyń ár sany «Tuń­ǵyshtar», «Serpilis», «Umtylys», «Yntymaq», «Táýekel» syndy taqyryptarǵa arnalyp, táýelsiz Qazaqstannyń tarıhyn jasaǵan, táýelsiz Qazaqstannyń atyn shyǵarýǵa atsalysqan tulǵalar qonaq bolady. Memleketimiz úshin asa mańyzdy kúnder, jyldar sóz bolyp, kelgen meımandar táýelsizdik jyldaryna saıahat jasaıdy, syrlarymen bólisedi. Sondaı baǵdarlamalardyń birinde Ulttyq banktiń alǵashqy tóraǵasy Ǵalym Baınazaruly ult­tyq valıýtamyz – teńgeniń aınalymǵa qalaı engeni týraly: «Keńes úkimeti ydyraǵan soń eko­nomıkalyq daǵdarys saldary­nan barlyq saladaǵy baǵa 50 esege deıin qymbattap ket­ti. Elbasynyń tapsyrmasymen bárin zerttep, daǵdarystan shyǵar jol – tól valıýtamyzdy engizý degen sheshimge keldik. Bizge óte qupııa tapsyrma berildi. Sebebi, ol kezde Qazaqstan áli rýbldik aımaqta edi. Teńge týraly tipti, Parlament pen Úkimet te bilgen joq. Sol kezdegi Joǵarǵy Keńes depýtattary «Ulttyq bank qaıda qarap otyr?» dep bizdi kúnde synap, málimdemeler jasaıtyn. Al biz ony aldyn ala aıtsaq, rýbldi aımaqta bolǵandyqtan, zań buzǵan bolyp eseptelip, qoǵamda úlken tolqý bolyp, el úlken shyǵynǵa batar edi», dep áńgimelep bergen edi. El esin jıyp, eńsesin túzep, jan-jaǵy­na qaraı bastaǵan ýaqyttaǵy jeńisterimiz ha­lyqta maqtanysh týǵyzatyn. Ásirese, Sıdneı, London olım­pıadalaryndaǵy jetistikter áli kúnge deıin el aýzynda. Habarlardyń birinde Sıdneı Olımpıadasynyń jeńimpazy Ermahan Ybyraıymov qazaq boksshylarynyń jeńisimen qosa, Olımpıada chempıony, ma­rqum Bekzat Sattarhanov jóninde estelikterimen bólisken bolatyn. «Bekzat fınalǵa bir kún qalǵanda maǵan kelip, «Aǵa, maǵan maıkańyzdy beresiz be, rıngke sizdiń maıkańyzben shyqsam dep edim», dedi. Men «áli jeńgen joqpyn ǵoı» degende, «men sezip turmyn, siz chempıon bolasyz» dedi. Eger baıqasańyzdar sol kezde Bekzattyń maıkasynyń arty baılanǵan bolatyn. Endi, meniń maıkam oǵan úlken boldy ǵoı. Bekzattyń sol sózi maǵan da qýat berdi. Inim maǵan senip, siz jeńesiz dep tursa, meniń jeńilgenim jaramas edi», dep saǵymǵa aınalǵan sátterdi eske aldy Ermahan Yby­raıymov. Iаǵnı, stýdııaǵa kelgen adamdardyń ár sózi bizdi sonaý jyldarǵa alyp baryp, keshegi men búgingi kúndi salystyrýǵa, ótkenge saǵynyshpen qarap, keleshekten úmit kúttiredi. Jobanyń negizgi maqsaty da osy – ǵasyrlar boıy ulan-baıtaq jerimizdiń tutastyǵy úshin kúresken ata-babamyzdyń erligin, kók aspan astynda erkin samǵaý jolynda talaı qıyndyqty jeńgen elimizdiń túbinde bostandyqqa jol jetkizgenin umyttyrmaý. Táýelsiz eldiń tarıhyna qa­tys­ty habardy ár jeksenbi 22.00-de «Habar» arnasynan kórińizder.   Gúlnur О́TJANQYZY