Nursaı – respýblıkamyzdyń eń shalǵaıda ornalasqan aýyldarynyń biri. Budan úsh-tórt jyl buryn jýrnalıstik issaparmen osy aýylǵa jolymyz túsken edi. Sol kezde nursaılyqtardyń aýyz sýdan úlken qıyndyq kórip júrgenderine, olar ony jyraqtaǵy Leker kóli mańynan tasyp iship otyrǵanyna kýá bolǵanbyz. Ekinshiden, sonaý jetpisinshi jyldary salynǵan orta mektep ǵımaratyna sol ýaqyttan beri kúrdeli jóndeý júrgizilmegen eken. Kúzdiń yzǵyryq kúnderi men uıytqı soqqan qysqy borandarda ǵımarat ishin keýlegen jel mundaǵy oqýshylardy dirdektetip qoıa beretini jónindegi áńgimelerdi de qulaǵymyz shalǵan-dy.
Árıne, sodan soń gazetimizge Nursaı aýylynyń qos túıtkili jóninde syn maqala jazylǵan bolatyn. Áıtse de sol kezde buǵan óńirdegi atqarýshy bılik jetekshileriniń bir de biri selt etpegenine qaıran qalǵanbyz. Degenmen, ıgiliktiń erte keshi joq degendeı, taıaýda osy aýylda aýyz sýmen qamtý júıesi paıdalanýǵa berilip, mektep ǵımaratyna kúrdeli jóndeý júrgizilgeni úlken qýanysh sezimin týǵyzady. Jiliktep aıtar bolsaq, «Aqbulaq» memlekettik baǵdarlamasy boıynsha júzege asqan jobaǵa 247 mıllıon teńge qarajat bólingen. Al mekteptiń kúrdeli jóndeýine 162 mıllıon teńge jumsalǵan.
Aýyz sý júıesin tartýǵa eseptelgen merdigerlik jumystar o basta 11 aıǵa eseptelse, ony óńirdegi qurylys salasy tarlandarynyń biri Karımolla Jaqypov basqaratyn «QurylysGaz» JShS-niń qurylysshylary nebári úsh aıdan astam ýaqyt ishinde sapaly túrde aıaqtap shyqqany taǵy bir mereı. Bul rette atalmysh nysannyń jedel iske qosylýyna Batys Qazaqstan oblysynyń ákimi Altaı Kólginovtiń tikeleı shapaǵaty tıgenin aıtpaı ketsek shyndyqqa qııanat.
Gáp mynada. Nursaı aýylyndaǵy sýmen qamtý júıesin aıaqtaýǵa aýdandyq bıýdjetten bólingen qarajat tapshylyq jasaǵan eken. Osy jaıtqa Kaztalov aýdanyna sapary barysynda kýá bolǵan óńir basshysy shuǵyl sheshim qabyldap, oblystyq bıýdjetten taǵy da qosymsha 182 mıılıon teńge bóldirýge yqpal jasapty. Kúni búgin aýyldaǵy 136 úıdiń 126-sy aýyz sý júıesine qosylyp úlgergen. Qazir bul isti tolyqtaı aıaqtaý jumystary da márege taıalyp keledi.
Mine, keshegi bir kúnderi shalǵaıdaǵy Nursaı aýyly turǵyndarynyń tóbelerin kókke jetkizgen qos qýanyshtyń syry osyndaı.
Temir QUSAIYN,
«Egemen Qazaqstan»
Batys Qazaqstan oblysy
Kaztalov aýdany
Nursaı aýyly