Dúngen dıasporasy tyǵyz ornalasqan Qordaı jáne Jambyl aýdandarynyń aýyl dúkenderi alkogoldi ishimdikter men temeki ónimderin satýdan bas tartty, dep habarlady QazAqparat.
«Qazaqstan aýmaǵynda shamamen 50-60 myń dúngen turady, olardyń deni Jambyl oblysynda, Qordaı men Jambyl aýdandarynyń Jalpaqtóbe, Masanshy, Sortóbe aýyldarynda ómir súredi, - dedi Jambyl oblysyndaǵy «Vynhýa» dúngen mádenı ortalyqtary qaýymdastyǵynyń jetekshisi Rýslan Ismazov.
«Dúngender óz mádenıetin, týǵan tilin, salt-dástúrin saqtaı otyryp, jastardy ata-babany qurmetteýge, úlkenderdi syılaýǵa jáne eńbekqorlyqqa úıretip keledi», - dep atap ótti ol.
Osylaısha, dúngen aqsaqaldary jastardyń basyndaǵy keleńsizdikter alkogol saldarynan týyndaıdy degen sheshimge keldi. Ardagerler men meshit ımamdary kásipkerlerge ótinish bildirip, dúken sórelerinen temeki men ishimdik ónimderin alyp tastaýdy surady.
«Qordaı aýdanynyń birneshe aýylynda, sondaı-aq Jambyl aýdanyndaǵy Jalpaqtóbe aýylynda dúkender araq-sharap pen shylym satýdan tolyǵymen derlik bas tartty», - dedi R.Ismazov.
Onyń aıtýynsha, aýyldarda quqyqbuzýshylyqtar sany edáýir azaıyp, jastar salaýatty ómir saltyn ustanatyn bolǵan. Búginde Qazaqstan halqy Assambleıasy jastar tárbıesine, olardyń qoǵamdaǵy ornyna asa mán berip otyr.