Qazaqstan Respýblıkasy Ulttyq Olımpıadalyq komıteti Halyqaralyq Olımpıadalyq komıteti tarapynan aǵzasynan tyıym salynǵan preparattardyń izi tabylǵan 2008 jáne 2012 jyldardaǵy Olımpıada oıyndaryna qatysqan qazaqstandyq sportshy Ilıa Ilınge qatysty jaza qoldanylǵandyǵy týraly resmı habarlama aldy, dep habarlaıdy QazAqparat.
Halyqaralyq Olımpıadalyq komıtetiniń tártiptik komıssııasy 2008 jyly Beıjińde jáne 2012 jyly Londonda ótken Olımpıada oıyndarynyń jeńimpazy, 94 kg salmaq dárejesinde óner kórsetken qazaqstandyq aýyr atlet Ilıa Ilınniń «A» jáne «V» dopıng synamalarynyń qosymsha tekserý qorytyndysy boıynsha qazaqstandyq sportshyny sol Oıyndardan shettetip, kórsetken nátıjeleriniń kúshin joıyp, júldelerin qaıtaryp alý týraly sheshim shyǵardy.
Sportshyǵa qoldanylatyn jazanyń merzimin Halyqaralyq aýyr atletıka federasııasy(IWF) anyqtaıdy.
Esterińizge sala keteıik, «ádil sport» qaǵıdalary men taza sportshylardy qorǵaý jáne dopıngti qoldanýǵa «nóldik tózimdilik» saıasatyn qoldaý - Halyqaralyq Olımpıadalyq komıteti men Qazaqstan Respýblıkasy Ulttyq Olımpıadalyq komıteti qyzmetiniń basty baǵyty. QR UOK Halyqaralyq Olımpıadalyq komıteti tarapynan tanylǵan elimizdegi jalǵyz uıym, sonymen qatar Olımpıadalyq Hartııa men Búkilálemdik dopıngke qarsy Kodeksin tanyp, álemdik dopıngke qarsy qozǵalystyń múshesi bolyp tabylady.